Ish-ministri i Mbrojtjes, Gazmend Oketa, ka ngritur pikëpyetje lidhur me arrestimin e Presidentit të Venezuelës, Nicolas Maduro, nga SHBA-të.
Teksa ishte i ftuar në emisionin ‘Off the Record’ me gazetarin Andrea Danglli në A2 CNN, Oketa tha se Maduro vërtet mund të ketë kryer krime, por shtoi se krime kanë kryer edhe Presidenti Vladimir Putin dhe kryeministri Benjamin Netanyahu.
Ai shtoi se Trump jo vetëm që nuk i ka arrestuar këta dy liderë, por sipas tij, u ka shtruar edhe tapetin e kuq.
“Problemi është tek e drejta. Nëse duam të bëhemi të lumtur dhe të themi që Amerika është më e fuqishmja dhe ka gjithmonë të drejtë, atherë këtu nuk ka nevojë për emision. Nëse do të themi që Maduro ka kryer krime, absolutisht po. Po Presidenti Putin nuk ka kryer? Ka një mandat arresti ndërkombëtar. Presidenti Trump i shtroi tapetin e kuq Presidentit Putin. Ndërkohë që shumë vende të BE-së kanë deklaruar se nëse Putin ulet në ndonjë nga këto vende, do të arrestohet. Po ashtu e njëjta gjë edhe me Netanyahun, i ka shpallur gati luftë totale gjithë organizmave ndërkombëtarë. Problemi është çfarë ndodh me sigurinë globale dhe çfarë efekti ka kapja e Maduros”, tha mes të tjerash Oketa.
