Arrestimi i gjyqtarit Ibrahim Hoxha dhe djalit të tij, Ledion Hoxha ka ndodhur mbrëmjen e djeshme rreth orës 22:30 minuta. Sipas burimeve policore mësohet se gjyqtari në fjalë ishte duke marrë para në dorë për një çështje që e kishte në shqyrtim.
Mësohet se i biri, Ledioni është futur në një lokal, ku ka takuar disa persona të tjerë nga të cilët ka marrë shumën prej 6 milionë lekësh të reja. Policia që kishte rënë në gjurmët e aferës korruptive, pasi ka parë të gjithë dinamikën e ngjarjes ndërhyri menjëherë, duke prangosur djalin dhe më pas të atin, Ibrahim Hoxha.
Ata më pas janë shoqëruar në ambientet e Drejtorisë së Policisë së Tiranës, ku dhe i është kërkuar të japin dëshmitë e para.
Ja vendimi që pritej të jepte gjyqtari Ibrahim Hoxha
Sipas burimet nga grupi hetimor bëhet e ditur se gjyqtari po bënte gati vendimin për prishjen e vendimit të trashëgimisë në favor të Dritan Jazenxhiut, i cili ishte në gjyq me të motrën pasi e ëma i kishte lënë pronën (shtëpi e dyqane) me trashëgimi të motrës. Vendimi do të shpallej sot.
Kush është gjyqtari Ibrahim Hoxha?
Ibrahim Hoxha është gjyqtar pranë Gjykatës së Tiranës. Në dhjetor të 2013-ës, ishte ish-ministri i Drejtësisë, Nasip Naço që kërkoi shkarkimin e gjyqtarit Hoxha. Ministri i Drejtësisë i kohës, Nasip Naço i propozon Këshillit të Lartë të Drejtësisë masën shkarkim nga detyra për gjyqtarin Ibrahim Hoxha. Kjo masë disiplinore u propozua, pasi Hoxha kishte kryer shkelje shumë të rënda procedurale, pasi pezulloi ekstradimin e Paro Laçit. Në atë kohë, KLD nuk e mori parasysh propozimin e Ministrit Naço dhe gjyqtari vijoi punën e tij në atë post. Ndërkohë mësohet se Hoxha ka qenë anëtar i trupës gjykuese për çështjen e 21 Janarit. Bëhet fjalë për gjykimin e dosjes së Armando Kasajt, i cili akuzohej se kishte fshirë serverin e kamerave të Kryeministrisë më 21 janar. (javanews.al / a.r)
