Policia ka vënë në pranga autorin e dyshuar të kërcënimit ndaj biznesmenit Zija Shulku, pronar i një pike karburanti në Peshkopi, të cilit i kërkoi 50 mijë euro. I arrestuari është një 21-vjeçar, Engjell Karoshi, i identifikuar nga policia brenda pak orësh nga ngjarja.
Me një kapuç në kokë, 21-vjeçari dyshohet se rreth orës 14:30 të 2 tetorit vendosi në ambientet e karburantit një kuti pice, mbi të cilën ndodheshin një ekran, pjesë elektronike dhe tela, për ta paraqitur si një pajisje shpërthyese të telekomanduar.
Mbi kuti kishte lënë edhe një letër kërcënuese, ku i kërkonte biznesmenit 50 mijë euro. Pagesa duhej të bëhej në kriptomonedha, përmes një pike këmbimi dhe në adresën e përcaktuar nga autori.
Në letër pretendohej se kutia përmbante eksploziv C4 dhe ishte e pajisur me sensorë lëvizjeje. Autori kërcënonte se ajo do të shpërthente nëse nuk paguhej shuma brenda afatit, nëse kutia lëvizej apo nëse njoftohej policia. Pas ndërhyrjes së forcave xheniere të RENEA-s, kutia u hap dhe u kontrollua, ndërsa rezultoi se brenda saj nuk kishte lëndë shpërthyese.
“Më datë 02.10.2026, shërbimet e Komisariatit të Policisë Dibër, në bashkëpunim me Sektorin për Hetimin e Krimeve të Rënda dhe shërbimet Operacionale në DVP Dibër, finalizuan operacionin policor të koduar “Kërcënimi”. Si rezultat i reagimit të menjëhershëm dhe hetimit intensiv, brenda pak orësh u bë i mundur identifikimi, kapja dhe arrestimi në flagrancë i shtetasit E. K., 21 vjeç, i dyshuar për veprën penale “Shtrëngimi me anë të kanosjes ose dhunës për dhënien e pasurisë”.
Pas mbërritjes së forcave speciale xheniere të RENEA-s, u krye hapja dhe kontrolli i kutisë, nga ku rezultoi se brenda saj nuk kishte lëndë shpërthyese. Nga hetimet e kryera rezultoi se ky shtetas dyshohet se, rreth orës 14:30, në ambientet e një karburanti në pronësi të shtetasit Z. Sh., kishte vendosur një kuti të dyshimtë, mbi të cilën ndodheshin një ekran, pjesë elektronike dhe tela, duke krijuar dyshimin se bëhej fjalë për një pajisje shpërthyese të telekomanduar.
Mbi kuti ishte vendosur një letër kërcënuese, përmes së cilës kërkohej pagesa e shumës prej 50 000 eurosh, në formën e një gjobe. Pagesa kërkohej të kryhej në kriptomonedha, përmes një pike këmbimi të kriptomonedhave, në adresën e përcaktuar nga autori. Në letër, autori kërcënonte se kutia do të shpërthente nëse pagesa nuk kryhej brenda afatit të përcaktuar prej tij, nëse kutia do të lëvizte ose nëse do të njoftohej Policia apo persona të tjerë. Gjithashtu, ai pretendonte se kutia përmbante lëndë plasëse C4, ishte e pajisur me sensorë lëvizjeje dhe telekomandim dhe se ambienti monitorohej me kamera”, njoftoi Policia.
Policia arrestoi 21-vjeçarin për “Shtrëngim me anë të kanosjes ose dhunës për dhënien e pasurisë”. Hetimet vijojnë për të zbardhur plotësisht ngjarjen dhe për të verifikuar nëse ka persona të tjerë të përfshirë.
