Gjykata e Elbasanit ka caktuar masën e sigurisë “arrest në burg” për Naim Çekrezi dhe Ilir Çekrezi, babë e bir, të cilët akuzohen për vrasjen e bashkëfshatarit të tyre, Bajram Shinkolla, shkruan Gazeta Shqiptare.
Ngjarja në fjalë ndodhi më 14 mars në Shalës të bashkisë Cërrik. Prokuroria e ka cilësuar të ligjshëm arrestimin e dy autorëve të dyshuar, të cilët mendohet se kishin si qëllim grabitjen e viktimës. At e bir akuzohen se kanë vrarë Shinkollën, duke i grabitur 250 mijë lekë të reja si dhe 1880 euro. Mësohet se Naim Çekrezi, ka mohuar para togave të zeza të ketë qenë pjesëmarrës në vrasjen e fqinjit të tij në Cërrik. 56-vjeçari deklaroi se nëse i biri, Ilir Çekrezi, 25 vjeç, është vrasësi i bashkëfshatarit të tyre, ai duhet të marrë dënimin e merituar. Sakaq, Naim Çekrezi ia ka kaluar të gjitha përgjegjësitë për ngjarjen të birit.
Duke e konsideruar vetën të pafajshëm, 56-vjeçari kërkoi që të lihet i lire. Ndërsa i biri Ilir Çekrezi është shprehur se nuk është në gjendje të japë shpjegime. Prokurori i çështjes, Neritan Hoxha pohoi se duke u nisur nga provat e administruara në vendngjarje si dhe nga deklarimet e të ndaluarve ekzistojnë elementë të konsumit të veprës penale “Vjedhje me pasojë vrasje” e kryer në bashkëpunim. Për këto arsye ai i kërkoi trupit gjykues masën e “Arrestit me burg”.
Në fund të seancës trupi gjykues i kryesuar nga gjykatësja Idush Maliqi e ka cilësuar të drejtë kërkesën e prokurorit dhe vendosi t’i lërë në burg.
BW
