Policia e Shtetit ka arrestuar dy persona të cilët akuzohen për përkrahjen e shtetasit Arnolt Canameti të arratiset nga aeroporti i Rinasit, pasi u deportua nga autoritetet franceze.
Canameti, ndaj të cilit rëndojnë disa akuza të rënda si “Vrasje me dashje e mbetur në tentativë”, “Prodhim dhe mbajtje pa leje të armëve të ftohta dhe të zjarrit”, “Shkatërrim prone” dhe “Prishje e qetësisë publike”, në një moment pakujdesie, u largua nga sektori i përpunimit të personave të deportuar dhe jashtë terminalit u ndihmua nga personat e arrestuar.
Sipas policisë, ky shtetas o deportua ditën e djeshme nga autoritete franceze me disa persona të tjerë, por uniformat blu nuk kishin dijeni se mes të deportuarve ishte edhe i kërkuari për vepra të rënda penale.
Ja njoftimi i plotë i policisë
Sot në 16.12.2015 në orët e para të mëngjesit u arrestuan në flagrancë për veprën penale “Përkrahje e autorit të krimit, e kryer në bashkëpunim”, parashikuar nga nenet 302 dhe 25 të Kodit Penal,shtetasit:
- Murat Hysa, 50 vjeç, lindur në Karicë, Burrel
- Ylber Ndoi, 29 vjeç, lindur në Mat, Burrel.
Arrestimi i tyre u bë pasi në datë 15.12.2015, rreth orës 14:00, shtetasi Murat Hysa në bashkëpunim me shtetasin Ylber Ndoi kanë ndihmuar në pritjen dhe transportimin e Arnolt Canametit, 20 vjeç, lindur dhe banues ne Burrel, i shpallur në kërkim për veprën penale “Vrasje me dashje e mbetur në tentativë”, “Prodhim dhe mbajtje pa leje të armëve të ftohta dhe të zjarrit”, “Shkatërrim prone” dhe “Prishje e qetësisë publike”, parashikuar nga nenet 76, 22, 278/5, 279, 274 dhe 150 të Kodit Penal.
Shtetasi Arnolt Canameti është kthyer në kategorinë “i deportuar” nga autoritetet policore franceze, në datë 15.12.2015 në aeroportin “Nënë Tereza”, por autoritetet shqiptare policore nuk kanë patur dijeni paraprake për kthimin e tij me këtë avion.
Gjatë shoqërimit të të deportuarve nga avioni në drejtim të godinës së përpunimimit të shtetasve, pikërisht kur ka zbritur nga mjeti transportues, duke përfituar nga mungesa e vëmendjes së shërbimeve të policisë Canameti ka mundur të largohet në drejtim të daljes nga rrethimi i aeroportit, ku është pritur dhe shoqëruar nga Hysa dhe Ndoi.
Shërbimet e SHÇBA-së po kryejnë ndërkohë hetime të plota për ngjarjen.
Policia po vazhdon punën për kapjen e shtetasit Arnolt Canameti.
Materialet iu referuan Prokurorisë së Rrethit Gjyqesor Tiranë për veprime të mëtejshme.
