Nga Sokol Balla/
Për një person me origjinë myslimane sot nuk është e lehtë të dalë dhe të ndëshkojë kasaphanën e Parisit. Gjithsesi sot Hamasi, një organizatë që edhe vetë proklamon Kalifatin si dhe Xhihadi Islamik i Palestinës, që aksionet kamikaze i kanë pjesë të veprimtarisë së tyre, kanë dënuar aksionet e xhihadit të Shtetit Islamik.
Personalisht më kujtohet shtatori i vitit 2001. Në atë kohë punoja në Londër në BBC, e megjithatë e kisha të pamundur të mos ndjeja ftohjen e kolegëve të mi, kur i thoja se në Shqipëri ishim shumica myslimanë, porse nuk ndanim asgjë me 11 shtatorsat.
Sot pas 14 vjetësh, njësoj me mua mendon edhe Hamasi, edhe Xhihadi Islamik i Palestinës: se ISIS është një organizatë terroriste “trendy” dhe popullore. Sepse ata po dalin, nga veprimet e IS, shumë herë më të moderuara dhe për fat të keq jashtë mode, krahasuar nga “çunat” e veshur me të zeza, me Toyota të shtrenjta, me shumë më tepër para sesa tyrbet dhe kallashët e fillim viteve 2000.
Ndryshimi ama midis meje dhe Hamasit, dhe Xhihadit Islamik (vë bast edhe shumë shpejt ndaj Al Qaeda-s), është PRANIMI se xhihadi i ISIS, po kthehet në një modë dhe trend të rrezikshëm mes myslimanëve, nga Parisi e deri në Akra. Al Qaeda, Xhihadi Islamik, Hamasi, po e ndjejnë këtë, por thjesht nuk e pranojnë. Dhe këtu bashkohen me të njëjtin qëndrim të ndrojtur si Obama, Hollande apo Angela Merkel, ndaj armës më të fortë të ISIS, ideologjisë.
Dhe në fakt a nuk është ideja e Kalifatit, për një shtet që sfidon kufijtë kombëtarë, etnikë, rajonalë dhe që krijon një hapësirë të njëjtë ideologjike fetare? A nuk është kjo, fitorja e parë ideologjike e ISIS? Cfarë bashkon sulmet e Parisit, me ato të Boko Haram në Nigeri, me ato në Algjeri, Libi e Siri? Eshtë ideologjia.
Sipas burimeve ushtarake në Pentagon, ISIS sot numëron mbi 22 mijë ushtarë mercenarë nga e gjithë bota: me pasaporta amerikane, kanadeze, australiane, britanike, gjermane, franceze apo shqiptare. Dhe nuk ka mundësi të jetë paraja ajo që bën sexy idenë e bashkimit me ISIS. Ose së paku nuk është vetëm paraja. Eshtë padyshim ideologjia.
Në një intervistë për “Fox News”, një profesor i Marines University, ngriti sot këtë pyetje retorike: ”Imagjinoni sikur ushtarëve tanë, para zbarkimit në Normandi, t’u thonim: gjermanët vritini, por mos i quani Nazistë. Imagjinoni sikur komunistët të mos i quanim komunistë, por demokratë të zhgënjyer. Armiqtë nuk i zgjedhim ne. Ata kanë emrat e tyre për veten e tyre. Ne duhet t’i quajmë me terminologjinë e tyre. Dhe ata vetëquhen luftëtarë të xhihadit islamik”.
Dhe në fakt kjo është e vërtetë. Pavarësisht se sot tendenca e të moderuarve është që të thonë: “Ata nuk janë përfaqësues të Islamit. Ata nuk janë myslimanë”. Në fakt ata nuk janë myslimanë, sië mund të ndihem unë sot. Por pa diskutim ideologjia e tyre fetare e deklaruar si xhihadiste, ekstremiste, bazohet tek ai interpretim i Kuranit, që është po aq islamik, sa Xhihadi palestinez, Hamasi dhe Al Qaeda bashkë. Ndryshe sot këto tre organizata, nuk do ndiheshin të rrezikuara nga popullariteti I ISIS. Konkurenca mes tyre është sigurisht bazuar vetëm tek një gjë: ideologjia.
Kështu që para se të themi se ISIS ka para, apo se shfrytëzon varfërinë dhe injorancën , mjaft të lexosh histori të pabesueshme sesi vajza dhe fëmijë adoleshentë nga Britania, me një mirëqenie që kapërcen ku e ku atë të fshatrave të Librazhdit apo Maqedonisë Perëndimore, i bashkohen ISIS ëdo ditë, çdo javë e çdo muaj. Pra nuk është paraja. Eshtë ideologjia. Shoqëria perëndimore përveë dështimeve të mëdha të saja të shekullit të fundit, morale, sociale, dhe ekonomike, pra dështimit të ideologjisë së saj, po dështon të njohë dhe pranojë cilët janë armiqtë e saj, dhe ISIS është padyshim armiku i saj më i respektuar sot. Ajo i fyen ata sistematikisht duke mos i quajtur myslimanë ekstremistë sië ata janë, por thjesht si të shkretë që e bëjnë nga varfëria. Por vetëm një idiot nuk di sot të dallojë arsyen përse dje një palestinez hidhte veten në erë në Jeruzalem, nga një adoleshent arab, i lindur në një arrondissement të Parisit dhe francez deri në momentin që hodhi veten në erë në gate “H” të Stade de France: I pari hidhte veten në erë nga mungesa e opsioneve të tjera, i dyti nga ideologjia.
Ka ardhur momenti që ta shohim të vërtetën në sy dhe të pranojmë. Se ISIS është një organizim serioz fetar ekstremist islamik. Se ideologjia e tyre është tashmë trend i fuqishëm mes myslimanëve në gjithë botën. Dhe nuk ka dron, raketë e sulm ushtarak që jep rezultat efektiv ndaj kësaj arme. Duhet nisur nga pranimi i të vërtetës dhe thirrja e tij me emrin që ai meriton dhe vetëquhet. Islam radikal.
Myslimanët nuk ofendohen për këtë. As gjermanët nuk ofendohen kur u thua se Hitleri ishte nazist. As rusët kur u thua se Stalini ishte kriminel. Të gjithë jemi adultë dhe dimë të ndajmë nuancat e të njëjtës ngjyrë. Por ama të gjithë e dimë të vërtetën.
Dhe e vërteta është, se arma më e fortë e ISIS është ideologjia. Dhe se për këtë duhen respektuar. Armiku fillimisht duhet respektuar për atë që është. Duhet identifikuar arma e tij më e fortë.
Dhe vetëm kështu ai përballet në mënyrën e duhur.
