Marsel Qeleshi, jetimi i Shtëpisë së Fëmijës “Zyber Hallulli”, i cili qëlloi me gur autobusin e kombëtares serbe mbrëmjen e 7 tetorit, është shoqëruar mbrëmjen e sotme në polici.
Një ditë pasi rrëfeu për gazetën “Shekulli”, se lëviz gjatë gjithë kohës i armatosur pasi ka marrë kërcënime për jetën, ai është shoqëruar nga uniformat blu.
Në një intervistë për “Shekullin”, Marseli u shpreh se ka shkuar në polici për të marrë leje për dy armët që disponon pa leje.
“Po ndjehem i kërcënuar. I kam të gjitha mesazhet që mi kanë dërguar nga Serbia në Fejsbuk dhe në Instagram, ku më thonë se: “do ta presim kokën në qendër të Beogradit”. Madje më kanë shkruar disa serbë se: “Ivan Bogdanov, pra Ivani i Tmerrshëm do të vijë në Shqipëri dhe do më vrasë”. Unë nuk i kam frikë as këtë Ivanin dhe as të gjithë ivanët e Serbisë, sepse unë jam gjithmonë i armatosur dhe po pres nga dita në ditë që të më japë gjykata leje për pistoletën dhe pastaj le të vijë kush të dojë se, nuk kam frikë askënd”, shprehet Marseli.
