Armando Duka nuk ka ndër mend t’i rinovojë kontratën Redi Jupit në postin e trajnerit të përfaqësueses U-21. Ish-mesfushorit kuqezi dhe ish-drejtorit të sektorit të Kombëtareve të moshave i pat përfunduar kontrata para ndeshjes me Izraelin, por deri tani nuk ka pasur asnjë diskutim mes palëve. Redi Jupi deklaroi shkurtimisht se nuk kishte dhënë dorëheqjen, por i kishte përfunduar kontrata. Ai u mjaftua me kaq, por la të kuptohej se tani gjithçka ishte në dorë të presidentit të FSHF-së.
Historia
Redi Jupi në fillimet e veta në FSHF ishte ndër njerëzit më të vlerësuar nga Duka. Jo vetëm për aftësitë komunikuese, por edhe për egon për t’i bërë gjërat me një sy ndryshe. Në disa raste kontrovers me pjesën dërrmuese të opinionit publik dhe në disa raste edhe polemizues (rasti i Canës pak muaj më parë). Jupi fillimisht ishte përgjegjës i zyrës së zbulimit të talenteve dhe, më pas, edhe një nga menaxherët e përfaqësueses.
Interesant fakti se, ndër zyrtarët e FSHF-së ishte i pari që “u përplas” me De Biazin duke mos i fshehur idetë kundër që kishte në raste të caktuara me italianin. Kjo nuk i la përshtypje të mirë trajnerit të Shqipërisë, që gjithnjë e më shumë nisi ta shmangte ish-fantazistin e Dinamos dhe të Tiranës. Në këtë situatë, Duka ishte spektator dhe hera-herës i vinte mirë që Jupi nuk i shkonte pas “avazit” De Biazit, pasi ky i fundit ishte gjithnjë në qendër të vëmendjes dhe Duka nuk është një nga ata që i pranojnë kollaj kësi situatash…
Ndërkohë, rreth një vit e gjysmë më parë, pas largimit të Skënder Gegës nga U-21, Duka i pat propozuar Redi Jupit për të marrë drejtimin e kësaj Kombëtareje. Mësohet se Jupi nuk pranoi që në fillim dhe u desh një javë që Duka të priste që ish-mesfushori të bindej dhe të merrte drejtimin e kuqezinjve.
Krisja
Ka disa motive që sot Jupi nuk është më në listën e të preferuarve të Dukës…
Karakter i vështirë – Është e vështirë të mbijetosh në zyrat e FSHF-së nëse ke një karakter të fortë dhe bën indiferentin ndaj “të madhit”. Jupi, për hir të së vërtetës, nuk është konfliktuar ndonjëherë me Dukën, por as ka qenë një ndër “ushtarët” e verbër të bindur ndaj tij. Presidentit të FSHF-së kjo gjë nuk i pëlqente aq shumë, por Jupi hyn te personat e zgjuar dhe gjithnjë kishte shmangur përplasje fatale. E megjithatë qejfmbetjet kanë qenë të shumta.
Indiferenca në TV
Burime pranë FSHF-së bëjnë me dije se Duka nuk e kapërdinte dot faktin që shpeshherë, në studion e “Procesit Sportiv” në “Top Channel”, ku Jupi është pjesë e panelit të përhershëm, kishte kritika në adresë të FSHFsë dhe të drejtuesve të federatës, por Jupi nuk bënte si duhet “avokatin” dhe nuk ishte aktiv për të replikuar me kritikat që vinin nga të ftuar të ndryshëm.
Mungesa e kontrollit
“Nuk i kam ndërhyrë asnjëherë De Biazit, sepse nëse e bëj diçka të tillë, atëherë gjërat mund të krisen”, ishte përgjigjja e Dukës kur u pyet nëse influenconte apo jo mbi zgjedhjet e trajnerit të parë. Por a funksionon kështu edhe me moshat? Vështirë ta thuash. Nga burime pranë ekipeve kombëtare mësohet se kreu i FSHF-së përpiqet të ketë gjithçka nën kontroll, edhe pse kjo nuk përkthehet doemos me ndërhyrje të mundshme në punën e trajnerëve.
Redi Jupi nuk ka qenë ndër ata që i kanë “raportuar” shefit vazhdimisht për çdo gjë dhe ky ka qenë një tjetër motiv për krisjen mes të dyve. Mësohet gjithashtu se në FSHF kanë pritur që Jupi të kërkojë takim me Dukën për të biseduar për rinovimin e kontratës, por ish-lojtari nuk e ka bërë as këtë dhe këtë kreu i federatës e ka përjetuar keq, si një tjetër kapriço të vartësit të tij dhe përfundimisht ka vendosur që të mos ia rinovojë kontratën. Ndërkaq, mediat pro FSHF-së kanë nisur një sulm të ashpër ndaj Jupit, si për të treguar se vendimi për mosrinovimin e kontratës së tij ishte i merituar. /panoramasport/
ma.me
