Armand Duka është rizgjedhur për herë të pestë në krye të Federatës Shqiptare të Futbollit pas votimit të mbajtur ditën e sotme në Asamblenë e 7 të Përgjithshme Zgjedhore.
Në raundin e parë të votimit, asnjëri nga 3 kandidatët nuk mundi të merrte 2/3 e votave.
Nga numërimi i votave të 65 delegatëve të cilët morën pjesë në Asamblenë zgjedhore të FSHF në hotel “Adriatik” në Durrës, Duka mori 38, ndërsa Fino 24 vota.
Rezultati i votimit në raundin II
Armand Duka – 38
Bashkim Fino – 24
Të pavlefshme – 3
Armand Duka ka 16 vjet në krye të qeverisë së futbollit shqiptar. Megjithatë, kjo garë për Dukën nuk ishte si ato të kaluarat, pasi Bashkim Fino rezultoi një kundërshtar i fortë.
Në raundin parë, Armand Duka mori 39 vota, Bashkim Fino 22 vota, ndërsa katër vota ishin të pavlefshme. Pjesë e kësaj gare ishte edhe ish-arbitri Shpëtim Hala, por ai u skualifikua në raundin e parë pasi nuk mori asnjë votë.
“Jam i lumtur për mbështetjen që më keni dhënë”, u shpreh Duka në fjalimin e tij të falenderimit.
“Jam i lumtur jo për faktin se do të jem president i FSHF-së por për mbështetjen që më keni dhënë dhe ndërkohë ndjej obligimin e madh sepse nga sot fillon një gjë akoma më e vështirë për mua. Dua tju falenderoj për këtë asamble e cila dëshmon dhe një herë se ne jemi bërë organizatë me standarte të larta. Nuk do vecoj asnjë votues”, deklaroi Duka
Kandidati Bashkim Fino ka folur për herë të parë pas shpalljes së rezultatit për kreun e ri të FSHF-së.
Fino shprehet se do të vijojë më tej me ankimimin në gjykatat shqiptare, në KAS dhe FIFA.
Ai tha se i uroi suksese Armando Duka por do të vijojë procesin ligjor.
“Nuk jam i zhgënjyer nga rezultati. E prisja diçka të tillë sepse procesi ishte i parregullt. Do vazhdojmë procesin tonë ligjor. Disa shoqata fantazmë dhe disa ekipe që nuk janë ekipe morën pjesë në votim.Po të mos ishin 12 shoqatat, gara do të ishtë me ‘fair’. Pas gjykatave shqiptarë do shkojmë në KAS dhe në FIFA“, deklaroi Fino.
a.ç
