Gabriel Garcia si nuk e keni parë ndonjëherë. Biblioteka e Universitetit të Teksasit ka hapur për studime koleksionin e materialeve personale të fituesit të çmimit “Nobel”, Gabriel Garcia Marquez, historitë e të cilit e sollën Amerikën Latine në jetë për lexuesit në mbarë botën, transmeton “Koha Ditore” raportimin e Reutersit.
Koleksioni përfshin dorëshkrime gati 50 vjeçare, fotografi, letra dhe materiale të tjera personale të njërit prej gjigantëve të letërsisë së shekullit XX. Vitin e kaluar ky koleksion ishte blerë nga “Harry Ransom Centre”, një prej koleksionuesve më të mëdhenj në botë të materialeve origjinale.
Autori kolumbian, Garcia Marquez, i cili vdiq në prill të vitit 2014 në Mexico City në moshën 87-vjeçare, nisi karrierën si reporter në gazetë dhe u bë i njohur me “Njëqind vjet vetmi “, dinastinë epike e cila i ndihmoi atij që në vitin 1982 të rrëmbejë çmimin “Nobel” për letërsi.
“Lexuesit kanë qasje në veprat e përfunduara të tij, por përmes arkivit mund të shohësh anën njerëzore të këtij mjeshtri. Kjo është ajo pjesa ku ai refuzon disa paragrafë dhe madje faqe të tëra apo detyrohet t’i rishkruajë a t’i braktisë për të marrë një drejtim tjetër”, ka thënë Jose Montelongo, bibliografi i Universitetit të Teksasit, i cili ka punuar me këto materiale.
Koleksioni përfshin gati 40 kuti nga aktivitet letrare të tij prej vitit 1948 deri më 2009, dhe ka drafte të shumta të daktilografuara të veprave, duke përfshirë edhe “Dashuri në kohë kolere” dhe “Njëqind vjet vetmi” Aty po ashtu janë gati dhjetëra kuti të korrespondencave që datojnë prej vitit 1961 deri në vitin 2013 ku përshihen letrat e shokëve të Garcia Marquezit, kur ai kishte vështirësi t’i pranonte gjatë viteve ’60, në kohën kur po e shkruante veprën “Njëqind vjet vetmi”.
Derisa vitet kaluan dhe fama e tij u rrit, cikli i korrespodencave zgjerohet për të përfshirë regjisorin japonez Akira Kurosawa, ish-sekretarin e Kombeve të Bashkuara, Kofi Annan dhe shkrimtarin çek Milan Kundera. Në mesin e materialeve të tjetra ka edhe fotografi të koleksionuara prej viteve ’30: fotografi nga udhëtimet, fotografi të ngjarjeve formale dhe albumet “Amigos”, të cilat përfshijnë fotografi të tij me filmbërësit e njohur Woody Allen dhe Luis Buñuel si dhe me liderin kuban Fidel Castro.
Biblioteka e cila është e specializuar në restaurimin dhe ruajtjen e materialeve historike po ashtu do të sjellë versionin digjital të shumë gjësendeve që përmban arkivi i Garcia Márquezit. Koleksioni do të vendoset bashkë me arkivat e shumë autorëve të tjerë të mëdhenj të cilët kanë pasur ndikim në Garcia Marquezin, duke përfshirë Jorge Luis Borges-in, William Faulkner-in dhe James Joyce-in.
