Degët inxhinierike edhe këtë vit vijojnë të jenë ndër më të preferuarat për maturantët, duke kryesuar së bashku me mjekësinë listën e renditjes së programeve të studimit. Rektori i Universitetit Politeknik, Akli Fundo, sqaron se në total janë ezauruar më shumë se 70% e kuotave, ndërsa programet e Arkitekturës dhe Urbanistikës i kanë plotësuar të gjitha vendet bosh.
“Konkretisht, sivjet në disa degë kemi Universitetin Politeknik të Tiranës, ku kemi 100% të regjistrimit të kuotave, siç janë degët e Fakultetit të Arkitekturës dhe Urbanistikës. Në degë të tjera të Universitetit Politeknik, në shumicën e degëve, të cilat janë shumë të pëlqyera nga maturantët, kemi rezultate të regjistrimit mbi 90%”, tha Fundo.
Në krahasim me një vit më parë, kërkesat janë në rritje, kryesisht për Fakultetin e Arkitekturës, atë të Teknologjisë së Informacionit, të Inxhinierisë Elektrike dhe të Ndërtimit, por arsyet që një pjesë e mirë e këtyre programeve janë preferuar më shumë janë disa.
“Gjithmonë preferenca për degët inxhinierike është e lartë. Edhe niveli i studentëve që vijnë në Universitetin Politeknik, në përgjithësi, është i lartë, sepse degët inxhinierike të japin mundësinë për të pasur më pas, në tregun e punës, një nivel shumë të lartë edhe për sa i takon pagave. Gjithashtu, ka një ofertë shumë të madhe në tregun e punës për profesionet inxhinierike”, tha rektori.
Pjesa tjetër e kuotave pritet të plotësohen gjatë raundit të dytë, madje edhe në programe që sot ofrojnë shumë mundësi për të rinjtë.
“Inxhinieria matematike është një nga degët më të pëlqyera dhe më të kërkuara në tregun europian, sepse ofron mundësinë për të ndjekur më pas një master në degët më të mira inxhinierike, në universitetet më të mira europiane”, tha ai.
Rektori ka sqaruar se edhe pse kërkesat janë më të mëdha, kuotat kanë mbetur në të njëjtat shifra, me qëllim për t’u ofruar të gjithë studentëve cilësinë e duhur në mësimdhënie.
