Dita e 28 shkurtit do të jetë data e fundit kur do të shuhen të gjithë operatorët ilegalë të telefonisë mobile dhe fikse të Serbisë në Kosovë.Kështu ka thënë kryetari i ARKEP-it, Kreshnik Gashi, në emisionin “Ekonomia me Erëzën” në KTV.
Gashi theksoi se kjo është data përfundimtare e vendosur nga ARKEP dhe nëse nuk zbatohet, veprimet do t’i koordinojnë përmes rrugëve ligjore.
“ARKEP i ka dërguar një vërejtje përfundimtare operatorëve që veprojnë kryesisht në pjesën veriore të Kosovës, duke i kërkuar ndaljen ilegale të operimit të tyre deri me datën 28 shkurt të këtij viti. Dhe kjo datë është përfundimtare e caktuar nga ne, pas të cilës do të koordinojmë veprimet me institucionet tjera për zbatimin e ligjit nëse është nevojshme”, u shpreh Gashi në emisionin “Ekonomia me Erëzën”.
Ndalimi i veprimit të operatorëve ilegalë ishte arritur edhe me marrëveshjen për telekomunikacionin mes Kosovës dhe Serbisë, në Bruksel një vit më parë, por pala Serbe nuk kishte zbatuar marrëveshjen.
Kompanitë e telefonisë serbe që veprojnë në territorin e Kosovës dhe nuk figurojnë në listat e të lejuarve për operim janë: “VIP mobile” dhe “Telenor”, ndërsa kompanisë telefonike “MTS”, i është dhënë leja e përkohshme e operimit.Kosova zyrtarisht e ka fituar kodin telefonik +383 në dhjetor të vitit të kaluar. (b.an)
