Arbërishtja mund të mbahet gjallë me muzikën rock
Këta arbëreshë janë vërtetë novatorë. Djemtë e bendit arbëresh “Spasulati”, ngado që shkojnë bartin traditën. Përmes reggaes e rockut, por me tekste gati gjithmonë në gjuhën arbëreshe, këngët janë rrëfim i tyre. Vokalisti Fabi il Zalles, i cili njëherësh luan në bas, thotë se kur për herë të parë erdhi në Kosovë më 2009, në festivalin “FreedomFest”, do të befasohej nga pritja që iu bë. Ndihej krenar që kishte mundësinë t’ia dëshmonte shumëkujt se arbëreshët nuk janë vetëm pjesë e një mitologjie, por janë aty dhe ende e mbajnë gjallë gjuhën e kulturën e tyre.
Në Kosovë “Spasulati” u rikthye javën e kaluar, në edicionin e pestë të festivalit të birrës “BeerFest” në Prishtinë. Solli disa prej këngëve që grupi ka realizuar përgjatë 20 vjetëve, por që debutimin para publikut do ta bënte tek në vitin 2001, në Milano, si paragrup në koncertin e Manu Chaos. Të gjitha këngët kanë qenë në arbërisht. Për ta pak ka rëndësi fakti që publiku zor i kupton tekstet këngëve dhe atë që thoshte il Zalles kur i drejtohej masës për t’ia shpjeguar këngët ose për të ndarë një rrëfim me ta.
Pos il Zalles, bendin e kompletojnë edhe Federico Baffa në tastierë, Guiseppe Gorgani në kitarë, Ercole Pirro në bateri, Carmine Guido në saksofon dhe Guiseppe Grosso në tromb. (Më gjerësisht lexoni sot në E diela me Koha Ditore).
