Pak ditë pas ngjarjes së rëndë të ndodhur në fshatin Bastar i Mesëm në Tiranë, ku u vra me mjete të forta 34-vjeçari Arben Gjeci, Gjykata e Shkallës së Parë e Tiranës ka vendosur lënien në burg të autorit të krimit, Esat Cani.
Sipas burimeve nga prokuroria, 31-vjeçari nuk ka toleruar lidhjen e viktimës me motrën e tij, duke e masakruar me një levë hekuri. Ndërkaq, togat e zeza të kryeqytetit kanë vendosur masën e sigurisë “Arrest shtëpie” ndaj 20-vjeçares Elida Cani, e cila që prej disa muajsh ishte në një lidhje jashtëmartesore me viktimën, baba i tre fëmijëve. Gjithashtu, gjykata ka vendosur masën e sigurisë “Arrest shtëpie” dhe për 29-vjeçarin Dëfrim Kurti, bashkëshort i së resë, që u bë shkas për këtë ngjarje që tronditi banorët e zonës. Pas hetimeve të kryera dhe marrjes në pyetje të personave të përfshirë në këtë krim, prokuroria ka zbardhur kronologjinë e vrasjes së Arben Gjecit. Mësohet se Esat Cani, vëllai i shtetases Elida Cani, ka deklaruar se ka qenë ai, që e ka vrarë shoferin e furgonit të kësaj zone, duke e goditur me hekur në kokë.
“E godita, jo për ta vrarë, por që të vuante ca kohë dhe të mos të shkatërronte më tej martesën e motrës. E ruajta gjithë ditën Arbenin. E pashë furgonin e tij kur parkoi në lokal dhe piu kafe me kunatin tim, burrin e Elidës, pastaj të dy u larguan. Kunati iku në një lokal tjetër, ndërsa Arbeni u drejtua drejt shtëpisë së motrës. Arbenin e qëllova tri herë me levë pas koke dhe më pas u largova në shtëpi”, – ka thënë para hetuesve të çështjes, autori i vrasjes. Ndërkohë që motra e tij, Elida ka pranuar lidhjen me viktimën dhe është shprehur e penduar për gjithçka që ndodhi.“GSH” ka mundur të sigurojë dosjen e prokurorisë në lidhje me këtë ngjarje.
DËSHMIA E ELIDA CANIT
Fillimisht 20-vjeçarja nuk ka pranuar lidhjen jashtëmartesore me 34-vjeçarin, por më pas ajo ka treguar me detaje se si është lidhur me babain e 3 fëmijëve. “Nuk e pranova më herët se kisha lidhje me Arben Gjecin, pasi kisha frikë. Tani nuk kam se çfarë fsheh më. Kam pasur lidhje të fshehtë me Arbenin, që ka filluar disa muaj më parë. Atë natë e kishim lënë për t’u takuar. Burri nuk ishte në shtëpi, pasi ndodhej në lokal, ndërsa vjehrrin dhe vjehrrën i kishte zënë gjumi. Doja ta anuloja takimin, por Arbeni nuk pranoi dhe më kërkoi që të takoheshim. Vendi ku takoheshim ne të dy ishte një dhomë e veçuar nga shtëpia (shtëpia e burrit të saj). Pata merak se mos vinte burri, por ai më tha të rrija e qetë, sepse burri po pinte kafe. Kryem marrëdhënie dhe kur po vishej, më tregoi se kishte qenë i frikësuar gjithë ditën, pasi kishte pasur idenë që po e ndiqte dikush. Nuk pashë kush e qëlloi, por kur dola, pashë atë të përpëlitej në mes të pellgut me gjak. Mua më tha burri të fshija njollat e gjakut dhe unë i fshiva… jam penduar”.
DËSHMIA E AUTORIT ESAT CANI
31-vjeçari Esat Cani gjatë dëshmisë së tij është shprehur se dyshonte që Arben Gjeci ngacmonte ose nusen, ose motrën e tij, ndaj dhe kishte disa ditë që e ruante. “Kur u ktheva nga Greqia, ishim si pasagjerë në makinën që drejtonte Arbeni. Bashkë me mua ishte motra ime dhe e fejuara. Arbeni po sillej çuditshëm dhe unë aty dyshova se ai ishte lidhur ose me motrën time, ose me të fejuarën. Ditën e ngjarjes dola nga banesa dhe i thash babait se po iki në punë, kur po kaloja tek lokali pashë furgonin, por jo atë. Aty dyshova… shkova në shtëpi, mora një shufër hekuri dhe ika tek shtëpia e motrës dhe qëndrova pas kashtores. Nga ai pozicion pashë tek dera ku depërtonte drita një lëvize dhe pasi u hap dera, doli Arbeni. Ai më pa dhe filloi të qeshte me ironi. Unë e godita me hekur pas koke, dy a tri herë dhe ika qetësisht në shtëpi. Nuk doja ta vrisja, por ta rrihja që të vuante ca kohë”, është shprehur ndër të tjera autori i ngjarjes.
DËSHMIA E DËFRIM KURTIT
“Më telefonoi Elida duke qarë dhe më tha hajde shpejt se kemi një burrë të gjakosur në shtëpi, dikush ka qëlluar Arben Gjecin. Pastaj më tha me mua ç’të duash, ai ishte tek unë… Kur shkova në shtëpi e pyeta nëse dinte gjë mami dhe babi dhe për shkak të fjalëve që mund të hapeshin në fshat, vendosëm që të tregonim skenarin që Arbeni ishte plagosur në rrugë dhe e nxorëm trupin jashtë banese”.
a.cupaj
