E kushtëzuar nga lindja e fëmijës së parë, Arbana Osmani rikthehet me një format të ri në ekran pas rreth 1 viti larg. Programi që Arbana do të drejtojë titullohet “I can do that”, dhe do të ketë si protagonistë 8 personazhe pjesëmarrëse. Ata do të garojnë vetëm për një kauzë bamirësie, pra çmimi i madh do të shkojë për persona në nevojë.

Edhe pse emrat e personazheve ende nuk janë vendosur nga produksioni, vetë Arbana Osmani për gazetën “Panorama” ka treguar disa nga detajet e emisionit të ri.

“Spektakli zgjat 12 javë, dhe numrat që do të ekzekutohen nga pjesëmarrësit janë spektakolare, të specifikave të ndryshme, e që kërkojnë aftësi fizike superiore. Deri tani janë vetofruar shumë artistë për të marrë pjesë në këtë shoë, por kasti nuk është vendosur ende”, tha ajo.

E pyetur se si ndihet para moderimit të këtij formati të ri, Arbana shprehet: “Mua më pëlqen shumë formati, dhe po ashtu më pëlqen që do të punoj me Rezart Agën, me të cilin kam punuar shumë vite në “Big Brother”, dhe e vlerësoj si profesionist. Formatin e kemi zgjedhur bashkë me drejtuesit shumë kohë më parë, dhe shpresoj ta prezantoj sa më mirë”. tregon Arbana