Do të jetë Adriatiku i Mamurrasit skuadra që do të zëvendësojë Partizanin B në grupin A të Kategorisë së Parë. Federata Shqiptare e Futbollit nëpërmjet një njoftimi për shtyp bëri të ditur se Komisioni i Apelit të Licencimit, pasi u njoh me apelimin e klubit të futbollit Adriatik Mamurrasi, si dhe provat e paraqitura nga ky klub për plotësimin e kriterit financiar të licencimit, vendosi ti japë të drejtë Mamurrasit për të marrë pjesë në kampionatin e Kategorisë së Parë të sezonit futbollistik 2016-2017.
Tashmë në kalendarin e grupit A të Kategorisë së Parë ose më saktë në grupin e Veriut, Mamurrasi do të marrë vendin e Partizanit B që u tërhoq vetëm pak orë përpara ndeshjes hapëse të sezonit ndaj Erzenit të Shijakut. Skuadra e dytë e klubit të Kuq u lejua të merrte pjesë në këtë kampionat pikërisht për të zëvendësuar Adriatikun e Mamurrasit, që ishte përjashtuar fillimisht nga Komisioni i Licencimit.
Sezonin e kaluar Adriatiku Mamurrasit arriti të siguronte qëndrimin në Kategorinë e Parë pasi edhe u pozicionua në vendin e 9-t të grupit A fitoi me rezultatin 1-0 sfidën play-off ndaj Naftëtarit të Kuçovës./shqip/a.k
