Gjykata e Apelit Tiranë ka përgjysmuar masën e dënimit të dhënë nga Shkalla e Parë për një ish-punonjës policie, të deklaruar fajtor për dy vepra penale.
Në janar të këtij viti ish-efektivi i Drejtorisë së Përgjithshme të Policisë, Hamëz Demushi, u dënua nga Shkalla e Parë me 8 vjet burg për “ushtrim të ndikimit të paligjshëm ndaj personave që ushtrojnë funksione publike” dhe “prodhim dhe shitje të narkotikëve”.
Gjykata vlerësoi të provuar faktin se ai kishte paguar 2 mijë euro tek një person tjetër, i bashkëpandehur me të, për të ndikuar tek zyrtarë të lartë të Policisë së Shtetit për ta emëruar në Sektorin e Forces Operacionale në Drejtorine e Përgjithshme të Policisë së Shtetit. Gjatë kësaj kohe, Demushi, ishte i komanduar, por jo i emëruar në këtë strukturë.
Në 15 janar 2015 Demushi është propozuar për emërim, po ky propozim nuk është firmosur nga drejtuesi i atëhershëm i Policisë së Shtetit. Teksa u arrestua për këtë çështje, policia gjeti në banesën e tij një sasi prej 3.5 kilogramë lëndë narkotike të llojit kokainë, si dhe dy peshore elektronike farmacie.
Provat kryesore të prokurorisë, të vlerësuara nga Gjykata, ishin një mori përgjimesh mes të cilave mes Demushit dhe të bashkëpandehurit të tij, Avni Shaba, përdoreshin termat “shegë e mandarina”, si terma të koduar për përmendjen e lekëve. Vendimi i Shkallës së Parë u ankimua prej në Apel të pandehurit, por Shaba, i dënuar me 1 vit e 4 muaj, i cili hoqi dorë më pas nga ankimi.
Në 7 tetor 2016, një trupe gjykuese e Apelit, la në fuqi deklarimin e fajshëm të Demushit, por ndryshoi masën e dënimit, duke e dënuar atë përfundimisht me 4 vjet heqje lirie.
“Gjykata e Rrethit Gjyqësor Tiranë, në individualizimin dhe caktimin e masës së dënimit duhet te kishte vlerësuar drejt rrezikshmërinë e te pandehurit Hamez Demushi, faktin qe ai është i pa dënuar më parë; pendimin e thelle te pandehurit, moshën e të pandehurit.
Faktin që është kryefamiljar dhe ka një fëmijë të mitur, nuk ka asnjë të ardhur në familjen e tij sepse bashkeshortja e tij rezulton të jetë e pa punë.
I pandehuri Hamëz Demushi ka punuar me korrektese prane Sektorit të Hetimit në Mbulim të Drejtorisë Operacionale dhe ai ka rrezikuar dhe jetën”, radhiste Apeli arsyet pse duhet të ulej dënimi i ish-policit.
Me tej, Apeli theksonte se në rastin konkret, nuk rezulton që i pandehuri Hamez Demushi të paraqesë rrezikshmëri të theksuar shoqërore. Po sipas Apelit, sasia e lendes narkotike është relativisht e vogël, qe nuk e justifikon dënimin në maksimumin e parashikuar nga ligji./Panorama/a.m.
