Komisioni Qendror i Zgjedhjeve, pas caktimit të datën 30 qershor 2019 nga Presidenti si datë për zhvillimin e zgjedhjeve për organet e qeverisjes vendore, ka nisur punën për për përgatitjen e infrastrukturës zgjedhore.
Kryetari i Komisionit Qendror të Zgjedhjeve, Klement Zguri tha se “zgjedhjet e vitit 2019, do të jenë sfidë e rëndësishme për të gjithë, për institucionet, partitë politike dhe për shoqërinë shqiptare. Ato do të jenë jo vetëm mundësi e mirëpritur për të shprehur vullnetin politik, por do të shënojnë edhe një provë të rëndësishme maturie për sistemin tonë demokratik”.
“Ndaj, KQZ-ja është e angazhuar maksimalisht për të përmbushur rolin dhe detyrat që i burojnë nga ligji. KQZ ka nisur punën intensive për përgatitjen e të gjithë akteve ligjore dhe nënligjore, si dhe të infrastrukturës zgjedhore, në funksion të mirë organizimit të procesit zgjedhor. Vetëm një ditë më parë, KQZ miratoi Planin e Orientues të Veprimeve të Komisionit, i cili parashikon të gjithë aktet që duhet të miratohen, afatet ligjore dhe veprimet që duhen ndërmarrë në zbatim të Kodit Zgjedhor”, shton ai.
Po ashtu Zguri, shprehet se “sfida e zgjedhjeve do të përballohet me sukses, kur partitë politike pjesëmarrëse në to, veçanërisht partitë që ligji i ngarkon me përgjegjësi administrimi do të kuptojnë dhe pranojnë se detyrimet e tyre ligjore në raport me administrimin nuk janë opsione, nuk formojnë privilegj dhe as avantazh. Partneriteti me KQZ-në dhe bashkëpunimi vullnetmirë në administrimin e procesit është detyrim thelbësor si për KQZ-në, ashtu dhe për partitë që marrin pjesë në administrimin e procesit, është parakusht i suksesit”.
Për këtë arsye shton Zguri, kam dalë sot të kërkoj publikisht vëmendjen e partive politike në respektimin e dispozitave të Kodit Zgjedhor dhe ligjeve të tjera në fuqi, në përmbushje të rolit të tyre të rëndësishëm në mbarëvajtjen dhe mirë administrimin e procesit zgjedhor. Komisioni Qendror i Zgjedhjeve ka përgatitur module të ndryshme trajnimi për të gjithë nivelet e aktorëve të përfshirë në administrimin zgjedhor, të cilat do të jenë lehtësisht të aksesueshme edhe në faqen zyrtare të internetit të KQZ-së.
/b.d
