Drejtoria e Ujësjellësit të Vlorës i ka bërë thirrje gjithë banorëve të Novoselës se uji që vjen në shtëpitë e tyre nuk mund të përdoret për konsum, pasi nuk plotëson kriteret e trajtimit në depo për shkak të mungesës së energjisë elektrike.
Ujësjellësi i Vlorës në një njoftim shkruan se pas bërjes së analizave dhe klorimit të ujit do të ketë një njoftim të dytë se kur uji do të mund të jetë i konsumueshëm.
Njoftimi i plotë i Drejtorisë së Ujësjellës Kanalizimeve Vlorë.
Ujësjellës Kanalizime Vlorë, bën me dije se për shkak të mungesës së energjisë elektrike gjatë orëve të fundit për shkaqe sigurie të jetës së banorëve të Novoselës dhe fshatrave të kësaj Njësie Administrative si pasojë e përmbytjeve nga dalja e lumit “Vjosë” nga shtrati, ka pasur anomali në drejtim të furnizimit me ujë të pijshëm. Por, situata pritet që të stabilizohet gjatë ditës së sotme me rikthimin e energjisë elektrike. Gjatë kësaj të diele, në orët e pasdites pritet që të bëhet furnizimi me ujë i të gjithë Njësisë Administrative të Novoselës. Ujësjellës Kanalizime, kërkon nga banorët e Novoselës, të gjitha fshatrave të saj, por edhe të zonave të tjera që furnizohen nga ky Ujësjellës, përfshi edhe disa fshatra të Njësisë Administrative Qendër, të mos konsumojnë ujin për ta pirë apo për gatim. Deri në një njoftim të dytë, uji mund të përdoret vetëm për shërbime komunale apo vetjake, por e theksojmë që, kategorikisht jo për tu pirë apo për gatim. Bëjmë me dije se Stacionet e Pompimit të Ujësjellësit nuk janë përmbytur, por duhet të bëhet klorimi i tubacioneve. Pasi të kryhen analizat nga Drejtoria e Shëndetit Publik dhe pasi të jepet miratimi i specialistëve të shëndetësisë, uji mund të konsumohet. Nëpërmjet një tjetër njoftimi, do t’ju informojmë për momentin që uji i pijshëm mund të konsumohet. Kërkojmë mirëkuptimin tuaj, pasi gjithçka është në të mirë të shëndetit të popullatës.
