Komisioni i Apelit në UEFA ka lënë në fuqi vendimin për pezullimin e ekipit të Skënderbeut me 10 vite nga kupat e Evropës, vendim që lidhet me çështjen e trukimeve të ndeshjeve.
Lajmi u bë publik nga klubi i Skënderbeut përmes një deklarate shpërndarë për mediat. Klubi korçar paralajmëron ankimimin në Gjyatën Sportive të CAS nga ku shpreson heqjen e këtij dënimi të rëndë.
Skënderbeu akuzon UEFA-n se ka dhënë vendim për përfitime personale.
Deklarata e Skënderbeut:
Sot, më datë 4 Maj 2018, Komisioni i Apelit i UEFA-s shpalli vendimin mbi ankimin e paraqitur nga KF Skënderbeu.
Siç ishte paralajmëruar dhe pritej, asnjë ndryshim nga vendimi pararendës nuk është bërë nga Komisioni i Apelit, pavarësisht argumenteve dhe provave të paraqitura nga pala jonë në seancën dëgjimore të datës 26 Prill 2018.
KF Skënderbeu bën me dije se, brenda afateve ligjore, do të paraqese ankim në CAS, ku do të parashtrohen të gjitha faktet dhe provat që rrëzojnë qëndrimin paragjykues të organeve juridike të UEFA-s. Drejtësia për përfitime personale nuk është drejtësi, veçse abuzim me pozicionin dominues.
KF Skënderbeu është i sigurt në pafajesinë e plotë të kujtdo lojtari apo zyrtari të klubit. Për këtë, të gjitha rrugët e mundshme ligjore do të ndiqen për mbrojtjen e integritetit dhe arritjeve tona historike.
/a.m.
