Pak orë para protestës së PD-së dhe aleatëve të saj, ka ardhur edhe reagimi i Delegacionit të Bashkimit Evropian.
Sipas një deklarate, BE shprehet se përdorimi i lëndëve shpërthyese dhe mjeteve të tjera është i papranueshëm.
Brukseli i bën thirrje Lulzim Bashës, Monika Kryemadhit etj, që të garantojnë qetësinë.
Ndryshe nga herët e tjera, BE ka një apel edhe për Policinë. Teksa u kërkon vetëpërmbajtje efektivëve në terren, i këshillon ata që të mos u përgjigjen provokimeve të mundshme nga turma.
Deklaratë në prag të protestës së sotme, 8 qershor 2019
Ndërkohë që respektojmë plotësisht të drejtën themelore të qytetarëve shqiptarë për të demonstruar, ritheksojmë rëndësinë e ushtrimit të kësaj të drejte në mënyrë të rregullt dhe paqësore.
Ne dënojmë të gjitha aktet e dhunshme që kanë ndodhur në protestat e mëparshme. Asnjë formë e nxitjes së dhunës nuk është e tolerueshme. Përdorimi i eksplozivëve ose i ndonjë sendi tjetër të projektuar për të shkaktuar lëndime është krejtësisht i papranueshëm.
Është përgjegjësi e drejtuesve të protestës të sigurojnë që demonstrimet të mbahen në mënyrë të sigurt si për pjesëmarrësit ashtu dhe për banorët e tjerë Tiranës, si dhe për të shmangur çdo përshkallëzim gjatë protestave.
Autoritetet e zbatimit të ligjit gjithashtu kanë përgjegjësi për të vepruar me përmbajtje, edhe nëse provokohen.
Ne vazhdojmë t’i bëjmë thirrje të gjitha palëve të angazhohen urgjentisht në një dialog konstruktiv për të kapërcyer situatën aktuale politike.
