Ministri i Mjedisit, Lefter Koka, nëpërmjet faqes së tij zyrtare në Fb, apelon dhe inkurajon të gjithë qytetarët në vendin tonë në javën pa makina (16-22 shtator). “Në veçanti, më datën 22, të lini makinën tuaj në shtëpi, ashtu si shumë qytetarë të tjerë evropianë. Ecni, përdorni biçikletat ose drejtojuni transportit publik! Të paktën 1 ditë në vit të gjithë meritojmë ajër më të pastër”, apelon ministri.
Kjo është një nismë e Bashkimit Evropian dhe shtrihet në të gjithë botën, e titulluar “Java Europiane e Qarkullimit”, e cila finalizohet me datën 22 shtator me ditën “Në qytet pa makinën time”, e cila ka në fokus reduktimin e përdorimit të makinave private dhe promovimin e alternativave mjedisore në transport.
Veprimtaritë në kuadër të kësaj nisme zhvillohen në të njejtën kohë në 1130 qytete, në 35 shtete të botës, duke synuar të ndërgjegjësojnë publikun për pasojat negative që shkakton përdorimi i automjeteve në mjedis, si dhe 
për të inkurajuar zhvillimin e transportit të qëndrueshëm publik.
Në kuadër edhe të temës së vitit 2015 shpallur nga Bashkimi Europian “ Zgjidh. Ndrysho. Kombino” (Choose.Change. Combine) Ministria e Mjedisit ka nisur një fushatë sensibilizimi në lidhje me 22 shtatorin, ditën “Në qytet pa makinën time”.
Shqipëria është bërë anëtare e nismës europiane që prej vitit 2002.
