Këshilltarja për media e presidentit të Serbisë, Aleksandar Vuçiç, Suzana Vasiljeviç, ka thënë se gjendja e tij nuk është e mirë dhe se për këtë është dashur të anulojë disa takime në ditët në vijim, shkruan B92 të mërkurën.
Ajo ka përmendur edhe gjendjen në Kosovë si arsye për përkeqësimin e shëndetit të Vuçiçit.
“Kështu që kemi vendosur, në fakt mjekët i kanë propozuar që të ndalet dhe të pushojë pak”, ka thënë ajo, raporton Koha.
Një ndër ngjarjet e anuluara është edhe konferenca për 2-vjetorin e themelimit të Ballkanit të Hapur, që është dashur të nisë sot në Novi-Sad, e ku duhej të merrnin pjesë edhe kryeministri i Shqipërisë, Edi Rama dhe ai i Maqedonisë së Veriut, Zoran Zaev.
Gazeta “Danas” ka shkruar se kjo ngjarje është anuluar për shkak të tensioneve në Kosovë.
Kjo iniciativë për Ballkanin Perëndimor është refuzuar nga Kosova, Mali i Zi dhe Bosnjë-Hercegovina.
Po ashtu, sipas këshilltares së tij, Vuçiçi ka anuluar edhe takimet e sotme me ambasadorët e Kinës dhe Rusisë në Beograd.
Ndërsa kryeministrja serbe Ana Bërnabiç tha të mërkurën se presidentit serb Aleksandar Vuçiç i ka rënë gripi.
“Ai nuk po pushon, mund ta them. Do të doja që ai të pushonte edhe pak. Ai është nën një tension të tmerrshëm, natyrisht, për gjithçka që po ndodh në Kosovë, nuk ka fjetur për net të tëra. Atë e kapi gripi dhe të gjitha këto. Imuniteti i tij u dobësua, natyrisht, nga ato përpjekje dhe nga ai stres“, tha Bërnabiç për televizionin Happy.
Këshilltarja për media e presidentit serb Suzana Vasiljeviç tha të martën se Vuçiç kishte anuluar takimet me ambasadorët rusë dhe kinezë me këshillën e mjekëve.
Fjalimi i paralajmëruar i presidentit serb në konferencën dy ditore “Ballkani Perëndimor, një rajon, një treg, një hap drejt tregut të përbashkët të BE-së”, i cili fillon të mërkurën në Novi Sad, gjithashtu u anulua.
g.kosovari
E sigurt Brnabić? Nuk ka dore ndonje serbshoven ne semundje e tij?