Antiterrori: Ja 5 qytetet shqiptare ku luftëtarë të ISIS po blejnë apartamente
Alarmi më i fundit i strukturave antiterror ka të bëjë se persona të ndryshëm, që dyshohet se kanë luftuar përkrah ISIS, po investojnë fuqishëm në blerjen e pasurive të paluajtshme brenda territorit të Republikës së Shqipërisë, shkruan gazeta “Shqip”. Nuk dihet ende qëllimi i kësaj nisme, por të gjitha rrethanat të çojnë në arsyetimin paraprak që trojet apo godinat mund të përdoren për qëllime terroriste në të ardhmen. Zona ku është investuar më tepër në pasuri të paluajtshme është trekëndëshi Elbasan – Librazhd – Korçë, e cilësuar si pika më e nxehtë për sa u përket luftëtarëve që kanë shkuar në Siri për xhihad. Lajmin për këto dyshime të arsyeshme e kanë konfirmuar për gazetën “Shqip” burime nga agjencitë ligjzbatuese, të cilat shtojnë se nuk ka vend për alarm të “dritës së kuqe”, pasi të gjitha institucionet që mbikëqyrin blerjet apo transaksionet e kanë raportuar këtë fenomen dhe gjendja është në kontroll të plotë. Por ajo që shqetëson më së tepërmi organizmat shtetërore është përhapja e këtij fenomeni në të gjithë rajonin tonë, pasi ekziston rreziku që pasuritë e Shqipërisë të keqpërdoren nga grupet e errëta.. Strukturat që mbikëqyrin parandalimin apo goditjen e terrorizmit mendojnë se shkak për këtë ndërmarrje të dyshuar të Shtetit Islamik mund të jetë bërë fakti që shumë prej luftëtarëve shqiptarë që ndodhen në Siri duan të ikin nga lufta dhe shefat e ISIS-it po shfrytëzojnë lidhjet me njerëzit e besuar në Ballkan për të fuqizuar sektorin e investimeve në pasuri të paluajtshme.
QYTETET
Tirana – Kryeqyteti i shqiptarëve është cilësuar si vendi më i prekur nga fenomeni i ekstremizmit. Në Mëzez u arrestuan dy imamë që rekrutonin luftëtarë për në Siri. Ata janë ende në proces gjyqësor
Elbasani – Në Elbasan janë vërejtur disa lidhje të dyshuara të personave të rëndësishëm në ambientin e ekstremistëve të ISIS. Njëri prej tyre mendohet se lëviz fijet, bashkë me një shtetas turk
Librazhdi – Kjo zonë shënon numrin më të madh të nisjes së luftëtarëve drejt Sirisë dhe gjithashtu numrin më të lartë të personave që kanë mbetur të vdekur nga luftimet në tokat e kalifatit islam
Korça – Rrethinat e Korçës dhe Pogradeci, janë shndërruar në pika tepër të nxehta, ku fenomeni i ekstremizmit fetar ndihet tepër. Edhe prej andej janë larguar me dhjetëra luftëtarë drejt Sirisë
