Antimafia: Grupet që sillnin njerëz, tashmë trafikojnë drogë e armë
Shqiptarët janë vënë sërish në në qendër të vëmendjes së prokurorisë dhe të policisë italiane ndërsa janë arrestuar tre persona, dy prej të cilëve shqiptar dhe një italian. Në momentin e arrestimit policia vendase ka mundur të sekuestrojë kanabis, heroinë dhe armë, çka ka bërë që menjëherë pas arrestimit detajet e operacionit t`i japë vetë prokurori i Antimafias së Leçes, Cataldo Motta, i cili ka deklaruar se rruga e trafikut të drogës Shqipëri-Itali, është ende shumë e përdorur nga trafikantët ndërkombëtarë.
Prokurori prezantoi finalizimi i dy operacioneve të drogës, ku u sekuestruan 67 kg kanabis, 3 kg heroinë si dhe 3 kallashnikovë dhe një sasi e madhe municionesh, të cilat sipas policisë italiane, vinin nga Shqipëria. Në këto operacione, u arrestuan dy shqiptarë ndërsa Motta shtoi se bëhet fjalë për dy operacione shumë të rëndësishme, si për sasinë e drogës se kapur ashtu edhe për armët, të cilat sipas Prokurorit të Antimafias provojnë se tregu shqiptar është ende aktiv.
Gjatë operacioneve, veç armëve dhe drogës, u sekuestrua dhe një gomone me flamur italian dhe grek, e cila sipas policisë, shërbente për trafikun e lëndës narkotike nga Shqipëria në brigjet puljeze. Motta bëri me dije se: “Grupet kriminale shqiptare të cilat vite më parë drejtonin trafikun e njerëzve drejt Salentos, në një moment e braktisën atë dhe u nisën të ngarkonin gomonet me drogë, siç tregojnë dhe sasitë e mëdha të drogës së kapura në brigjet e Leçes. Edhe heroina, e cila është e provuar se vjen nga Pakistani dhe Afganistani, vijon të vijë transit në Itali nga Shqipëria”!
