Italia po përballet me një valë të fortë të nxehti, ndërsa temperaturat pritet të arrijnë deri në 39-40°C, veçanërisht në rajonet qendrore, jugore dhe në ishujt kryesorë të vendit.
Sipas parashikimeve meteorologjike, anticikloni afrikan do të vazhdojë të dominojë mbi Mesdheun qendror dhe perëndimor të paktën deri në fundjavë, duke sjellë mot shumë të nxehtë në pjesën më të madhe të vendit. Temperaturat maksimale do të luhaten nga 33 deri në 38°C, ndërsa në Siçili dhe Sardenjë priten kulme që mund të kalojnë 40°C.
Në veri të Italisë situata do të jetë më e paqëndrueshme. Parashikohen reshje lokale shiu dhe stuhi, kryesisht në zonat alpine dhe, nga mesi i javës, edhe në disa zona fushore. Këto fenomene mund të shoqërohen me breshër dhe erëra të forta.
Ndërkohë, në qendër dhe jug të vendit moti do të mbetet kryesisht i kthjellët dhe i thatë, me vapë të fortë edhe gjatë natës. Temperaturat minimale do të mbeten të larta, ndërsa të mërkurën pritet një tjetër rritje, me 35-39°C në zonat e brendshme dhe deri në 40-43°C në ishujt italianë.
Meteorologët paralajmërojnë se kjo është vala e tretë e të nxehtit e këtij sezoni, e cila pritet të zgjasë edhe gjatë ditëve në vijim, duke rritur rrezikun për stres termik, veçanërisht për të moshuarit, fëmijët dhe personat me sëmundje kronike.
Për shkak të kushteve ekstreme, Ministria italiane e Shëndetësisë ka shpallur alarm të kuq për disa qytete, niveli më i lartë i rrezikut për shëndetin, veçanërisht për të moshuarit, fëmijët dhe personat me sëmundje kronike. Numri i qyteteve nën alarm pritet të rritet gjatë ditëve në vijim, ndërsa autoritetet u bëjnë thirrje qytetarëve të shmangin ekspozimin në diell gjatë orëve më të nxehta dhe të konsumojnë sa më shumë lëngje.
Ndërkohë, në Firence është shpallur grevë e korrierëve me biçikleta dhe motorë, të cilët kërkojnë pezullimin e punës gjatë orëve të vapës ekstreme për arsye sigurie.
Meteorologët paralajmërojnë se vala e të nxehtit do të vazhdojë të dominojë mbi Italinë edhe gjatë ditëve të ardhshme, duke rritur rrezikun për probleme shëndetësore dhe duke rënduar situatën e thatësirës në shumë zona të vendit.
