Opozita, por sidomos PD, deri më tani është shquar në Kuvend për fjalor banal dhe sjellje tipike të fortësh rruge për të diktuar vullnetin e saj si pakicë në jetën parlamentare. Kjo tendëcë sjellje ka qenë lajtmotiv i saj edhe gjatë 4 viteve të mëparshme të Parlamentit. Brenda kësaj logjike PD që nga viti 2014 ka refuzuar Kodin Etik të Sjelljes në Kuvend të sjellë nga mazhoranca e atëhershme PS- LSI, dhe që vijon dhe sot të qëndrojë në kryesinë e Kuvendit dhe pret edhe votat e PD që të miratohet. Sërish PD nuk ka rënë dakord për të miratuar Kodin Etik të Sjelljes së deputetëve në Kuvend, një dokument ky minimalist që kufizon deputetët të flasin më fjalë të ndyra në Kuvend dhe të bëjnë sjellje rrugaçërore. Për momentin gjithshka është pezull pasi PD kërkon sërish kohë që ta shqyrtojë dokumentin në fjalë.
Deputetja e PS, Vasilika Hysi, ka zbardhur vendimet e marra ditën e sotme në mbledhjen e Këshillit të Rregullores dhe Mandateve. Nga Kryesia e Kuvendit, Hysi tha se deputetët e PD nuk pranuan që të miratohej kodi i sjelljes, me pretendimin se duhet rishikuar.
Deputetja tha se ky kod është nismë e mazhorancës, së cilës i janë bashkuar dhe deputetët e LSI. Sipas saj, në fund të mbledhjes kryetari i Kuvendit i dha mundësi opozitës që të bëhet pjesë e kësaj nisme, duke ftuar të gjithë grupet parlamentare dhe të gjithë deputetët të shprehin mendime për të përmirësuar këtë kod brenda dy javësh.
“Kodi i sjelljes është depozituar në kuvend në vitin 2014 dhe ka tre vite që nuk miratohet nga këshilli i mandateve. Ky kod është shumë i rëndësishëm, është një standard që e kanë të gjithë parlamentet. Është bazuar në një studim që i është bërë jetës parlamentare në Shqipëri. Këshilli arriti në përfundimin që ne nuk ishim të gatshëm ta miratonim, sepse opozita kërkoi të rishikohej. Ju vë në dijeni se ky kod është nismë e deputetëve të mazhorancës, të cilëve iu janë bashkuar edhe LSI. PD nuk i është bashkuar nismës, por në fund thanë se duhet një kod sjelljeje, por duhet parë më tej.
Kryetari i Kuvendit i dha mundësi opozitës dhe ne kemi vendosur:
Së pari: Ftohen grupet parlamentare të gjithë deputetët të shprehim mendime për ta përmirësuar brenda dy javësh.
Së dyti: U ngrit një grup pune me tre deputetë, të tre grupeve parlamentare, për të mbledhur mendime dhe për ti parashtruar.
Së treti: Kjo do diskutohet sërish në Komisionin e Mandateve.
Të gjithë bashkë, mazhorancë dhe opozitë duhet të jemi bashkë te kodi i sjelljes, për të ofruar atë që qytetarët presin”, tha Hysi.
ma.me/javanews.al
