Sekretari i Përgjithshëm i NATO-s Jens Stoltenberg kritikoi disa vende që duan të forcojnë mbrojtjen evropiane, duke theksuar se krijimi i strukturave “konkurruese” për NATO-n mund të çojë në një dobësim dhe ndarje të Aleancës Veriatlantike.
Stoltenberg u pyet në një konferencë në Universitetin Georgetown në Uashington për pasojat e marrëveshjes AUKUS midis Shteteve të Bashkuara, Australisë dhe Mbretërisë së Bashkuar në marrëdhëniet transatlantike.
“Unë e kuptoj që Franca është e zhgënjyer”, pasi Canberra përfundoi megakontratën për blerjen e nëndetëseve franceze pas AUKUS, tha ai. “Në të njëjtën kohë, aleatët bien dakord për qëllimin tonë kryesor që ne duhet të qëndrojmë të bashkuar,” u citua Stoltenberg.
Por “nuk besoj në përpjekjet për të krijuar diçka jashtë NATO-s që do të konkurronte ose zëvendësonte NATO-n,” shtoi ai.
Në një mesazh drejtuar 27 krerëve të shteteve dhe qeverive të mbledhur në Brdo pranë Kranj, norvegjezi Stoltenberg theksoi se 80 përqind e shpenzimeve për mbrojtjen e NATO-s sigurohen nga vendet jo-BE. “Sigurisht që janë Shtetet e Bashkuara, por edhe aleatë të tjerë,” tha ai.
“Por gjeografia është gjithashtu e rëndësishme, Turqia në jug, Norvegjia dhe Islanda në veri dhe Shtetet e Bashkuara, Kanadaja dhe Mbretëria e Bashkuar në perëndim. Nëse shikoni gjeografinë, ato janë të rëndësishme për mbrojtjen e të gjithë Evropës”.
“Çdo përpjekje për të dobësuar lidhjen transatlantike duke krijuar struktura alternative, duke thënë se ne mund të menaxhojmë vetë, jo vetëm që do të dobësojë NATO -n, por edhe do të përçajë Evropën,” paralajmëroi ai./m.j
