Papa Leone XIV do t’i nënshtrohet një ndërhyrjeje kirurgjikale në mushkëri në ditët në vijim, pasi gjatë kontrolleve mjekësore i është zbuluar një gjendër e lokalizuar në fazë shumë të hershme.
Lajmin e bëri të ditur vetë Ati i Shenjtë gjatë lutjes të së dielës, Angelus, nga dritarja e Pallatit Apostolik në Vatikan, përpara besimtarëve të mbledhur në sheshin e Shën Pjetrit.
“Gjatë disa kontrolleve të fundit, mjekët më zbuluan një gjendër të lokalizuar në mushkëri. Ai u identifikua në një fazë shumë të hershme dhe është i kufizuar mirë. Mjekët mendojnë se duhet ndërhyrë dhe duke ndjekur këshillat e tyre, kam vendosur të operohem për ta hequr. Ndërhyrja është planifikuar për ditët në vijim”, deklaroi Papa.
Sipas shpjegimit të Atit të Shenjtë, formacioni është zbuluar gjatë ekzaminimeve mjekësore dhe bazuar në vlerësimin e mjekëve, është vendosur që të hiqet përmes ndërhyrjes kirurgjikale. Deri më tani, nuk janë bërë të ditura hollësi të tjera mbi diagnozën e Papës apo ndërhyrjen që do të kryhet.
Gjatë fjalës së tij në sheshin e Shën Pjetrit, Papa Leone XIV përcolli edhe një mesazh për rëndësinë e të bërit mirë, pavarësisht mënyrës se si kjo vlerësohet nga të tjerët.
“Jo gjithmonë e mira që ofrojmë kuptohet, njihet dhe vlerësohet. Përkundrazi, ndonjëherë keqkuptohet dhe refuzohet. Por kjo nuk duhet të na shkurajojë”, u shpreh Ati i Shenjtë.
Ai theksoi se gëzimi që përcjell Kisha nuk është artificial, por i thellë, konkret dhe i vërtetë, i lidhur me përditshmërinë e njerëzve, me punën, buzëqeshjet, lotët, shtrëngimet e duarve dhe gjestet e mirësisë.
“Është një dhuratë e Zotit për shpëtimin e botës”, përfundoi Papa në mesazhin e tij për besimtarët dhe pelegrinët e pranishëm në Vatikan.
