Armando Meta
Ka jo pak dritë- hije, sa i përket përpjekjes së dy ish- deputetëve, Dashamir Tahiri i PD-së dhe, Shkëlqim Selami i LSI-së, për të rrëzuar vendimin e KQZ-së, që u ndërpret mandatin e deputetit. Ajo që vihet re në përpjekjet e dy ish- deputetëve për rifitimin e mandatit është rruga e ndryshme ligjore që ata kanë zgjedhur për të ankimuar vendimin e KQZ-së. Deputeti Selami ka bërë ankim ndaj KQZ-së në Gjykatën Administrative, ndërsa deputeti Tahiri e ka ankimuar çështjen e tij kundër KQZ-së në Kolegjin Zgjedhor. Të dy ish deputetët janë penalizuar me ndërprerje mandati, pasi, sipas Prokurorisë së Përgjithshme, kanë fshehur të dhëna në formularin e pastërtis së figurës. Po për fshehje të dhënash është penalizuar edhe ish kryetari i Bashkisë së Kavajës, Elvis Rroshi. Pra akuza ndaj të treve është e njëjtë: ajo e fshejes së të dhënave. Nisur nga kjo bëhet e qartë se, për sa kohë ato akuzohen për të njëjtën vepër, logjikisht do të ishte i njëjti vend ankimimi për ta pra: ose në Gjykatën Administrative, ose në Kolegjin Zgjedhor ose në Gjykatën Kushtetuese.
Por ajo që bie në sy është fakti se si dy ish deputetët ashtu edhe ish kryebashkiaku i Kavanjës, kanë zgjedhur rrugë të ndryshme për të ankimuar vendimin e KQZ për ndërprerje mandati. A jemi këtu përballë një paqartësie ligjore të paparashikuar në ligjin për dekriminalizimin? Apo secila palë po i ankimon çështjet në ato instanca të gjyqësorit ku dhe influencat politike janë më dominante pra PD duke influencuar në Kolegjin Zgjedhor dhe LSI në Gjykatën Administrative. Ana tjetër e kësaj është fakti se sa të vlefshme janë vendimet e Kolegjit Zgjedhor dhe të Gjykatës Administrative për të rrëzuar vendimin e KQZ-së? A duhej parashikuar në ligjin e dekriminalzimit që zyrtarët që preken nga ligji në fjalë mund të ankimohen në institucione gjyqësore qartazi të mirëpërcaktuara? A është lënë me paramendim e gjithë kjo hapësirë për ankimim ku gjithëfarë institucionesh drejtësie mund të marrin vendime kundër KQZ-së? Po roli i Gjykatës Kushtetuese në këtë process? Strategjia e zgjedhur nga dy ish- deputetët qartazi është e mirëmenduar nga avokatët e tyre, të cilët duket se kanë kapur këto boshllëqe ligjore, që i bëjnë lehtësisht të cënueshme vendimet e KQZ-së. Aq më shumë kur është fjala për mandate deputetësh.
