Kuvendi nuk e ka pranuar kërkesën e kreut të grupit parlamentar të Partisë Demokratike për zhvillimin e një interpelance urgjente me Kryeministrin Edi Rama mbi ankimin e këtij të fundit në Gjykatën Kushtetuese për pezullimin nga GJKKO-ja të Ministres për Infrastrukturën dhe Energjinë, njëherësh zv.Kryeministren, Belinda Balluku.
Kreu i Kuvendit, Niko Peleshi argumentoi se kjo çështje është në shqyrtimin e Kushtetueses dhe nuk mund të diskutohet në Kuvend. Ai theksoi se çdo përpjekje për të nxjerr një vendim politik pa fjalën e Kushtetueses, mund të cenojë parimet e pavarësisë së institucioneve dhe sundimit të ligjit.
“Në shkresën e Kuvendit kam argumentuar mospranimin e kërkesës për interpelancë. Objekti i kërkesës është aktualisht në shqyrtim në kushtetuese e cila po vlerëson nëse kërkesa është e pranueshme për shqyrtim në seancë plenare. Kërkesa për interpelancë urgjente, nuk duhet pranuar sepse çështja është në shqyrtim dhe është ky organ që do japë një interpretim përfundimtar mbi ndarjen e pushtetit mes institucioneve dhe kompetencat.
Çdo përpjekje për të nxjerr një vendim politik mund të cenojë parimet e pavarësisë së institucioneve e sundimit të ligjit. Domosdoshmëri të pritet vendimi i Gjykatës Kushtetuese”, deklaroi Peleshi.
