Rreth ¼ e të rinjve të Kosovës nuk e kanë parë asnjë prej politikanëve në skenën politike të Kosovës, si model për ta. Kjo shifër ka dalë sot nga një anketë të bërë nga Instituti Demokratik i Kosovës (KDI). Për këtë, portali Koha.net ka folur me analistin politik Imer Mushkolaj.
Ai ka thënë se kjo ka ndodhur si pasojë e humbjes së besimit në klasën politike në Kosovë.
“Rinia vite me radhë kanë dëgjuar se si ata janë pasuri e këtij vendi, ndërkohë që nuk është bërë asgjë për punësimin e tyre, për perspektiven e tyre, të cilën shumë nga ta, e shohin diku në Perëndim”, ka thënë Mushkolaj.
Mushkolaj, që ka qenë pjesë e pothuajse të gjitha iniciativave për të kërkuar një qeverisje të drejtë dhe pa keqpërdorime, së fundi të nxitur edhe nga afera “Pronto 2”, ai ka folur se kush është modeli që dominon sot në Kosovë, transmeton Koha.net.
“Modeli i politikanit që sot dominon në Kosovë konsiderohet të jetë keqpërdorues i parave publike, mos-llogaridhënës e gënjeshtar”, thotë Mushkolaj, teksa prej këtu niset edhe në përgjigjen se pse Albin Kurti prin si figurë politike më e dëshiruar me 13.7%.
“Këtu duhet gjetur edhe përgjigjen pse Kurti është më i pëlqyeri – ngase nuk është provuar në pushtet dhe i ka pasur në shënjestër pikërisht politikanët e llojit të tillë”, ka përfunduar Mushkolaj.
Drejtuesi i Lëvizjes FOL, Petrit Zogaj duke shpërndarë rezultatin e kësaj ankete i është gëzuar përqindjes së lartë të të rinjve që nuk e shohin asnjë politikanë si model për vete.
“Bash shpresëdhënëse po më duket kjo qasje. Krejt çka kisha dashtë është që me u rritë kjo shifër e refuzimit të kësaj strukturës të mbrapshtë që po dominon për dy dekada”, ka shkruar Zogaj., citohet Koha. (b.an)
