Pas lajmit se një anije tregtare shqiptare e nisur drejt Maltës është ndaluar nga marina ushtarake e Libisë nën akuzën për transport të paligjshëm mallrash,reagon Ministria e Punëve të Jashtme. Nga Ministria u tha se nuk ka ende një informacion as nga autoritetet apo nga familjarët.
“Kemi vetëm njoftimin e shtypit dhe menjëherë kemi filluar të interesohemi çfarë ka ndodhur, si përmes ambasadës tonë, ashtu dhe me ambasadën libiane në Tiranë,” u shprehën nga Ministria e Punëve të Jashtme të kontaktuar nga BalkanWeb.
Sipas informacioneve të mëparshme, mbrëmjen e kaluar anija “Envi 1”, me flamur panamez e pronar shqiptar ishte nisur nga porti i Zuaras, 110 kilometra larg Tripolit me destinacion Maltën. Në lundrim e sipër, anija është kapur nga autoritetet ushtarake bregdetare të Libisë, të cilat e kanë detyruar anijen të ankorohet pranë një tjetër port, atij të Zauya-s, një port kryesisht karburantesh, që ndodhet 50 kilometra në perëndim të Tripolit.
Sipas njoftimit, anija shqiptare e drejtuar nga kapiteni malazez Marko Markoviç u ndalua pas dyshimeve për transport të paligjshëm të materialeve të ndërtimit, përfshirë edhe rërën. Në përbërje të ekuipazhit prej 8 antarësh ndodhen edhe 5 marinarët shqiptarë, Maliq Bushati, Avni Buzi, Artur Selimaj, Xhodet Çelaj dhe Jurgen Balla.
