Një firmë britanike ka kaluar nëntë vitet e fundit në zhvillimin e një prototipi të fluturakes më të gjatë në botë në një hangar të madh avionësh në Cardington, Bedfordshire, Angli. “Airlander 10” është rreth 92m e gjatë, që i bie rreth 18m më i gjatë fluturaket më të mëdha. Airlander që ka kushtuar 25.2 milionë dollarë, mund të pluskojë në të njëjtin vend në ajër për tre javë rresht dhe mund të fluturojë edhe me vrima plumbash në të.
Ndërkaq, kjo fluturake, që mund të krahasohet me më shumë se gjashtë autobusë dykatësh, pritet të bëjë fluturimin e saj të parë brenda muajsh, ka thënë të hënën prodhuesi britanik “Hybrid Air Vehicles”.
“Hybrid Air Vehicles” po shpreson që Airlander, që lëviz me shpejtësi të ngadalshme dhe është i mbushur me helium, do të bie në sytë e konsumatorëve potencialë të cilët do të shprehin interesim për ta përdorur atë për të bartur ngarkesa apo të shpërndajnë ndihma, për mbikëqyrje, për komunikim apo aktivitete të lira. I njëjti mjet mund të bartë deri në 48 pasagjerë.
“Airlander” mund të ngrihet në ajër dhe të aterrojë në tokë vertikalisht, që do të thotë se nuk ka nevojë për pistë. Ai mund të operojë edhe në fusha të hapura, në shkretëtira, në akull apo në ujë, që do të thotë se mund të jetë i dobishëm për misione humanitare apo monitorim të vijës bregdetare.
Për të do të nevojiten edhe disa testime tokësore para se të kryejë fluturimin e parë në muajt e ardhshëm. “Hybrid Air Vehicles” shpreson të ndërtojë 12 fluturake të tilla në vit deri më 2018.
