Anëtari i Kolegjit të Posaçëm të Apelimit, Ardian Hajdari, i kërkoi Gjykatës së Posaçme të thërrasë 67 dëshmitarë për të vërtetuar se i ka dhënë atyre konsulencë juridike falas gjatë kohës që ushtronte avokatinë. Kërkesa e tij u pranua nga trupa gjyqësore.
SPAK e akuzon atë se nuk ka deklaruar të ardhurat nga puna si avokat, duke e ngarkuar me përgjegjësi penale për fshehje të pasurisë dhe deklarim të rremë të saj.
Por Hajdari thotë se ai nuk ka përfituar të ardhura në disa raste, pasi ka dhënë konsulenca falas dhe për të vërtetuar këtë do të pyes në gjyq 67 klientë, 5 të parët do të dëshmojnë në seancën e 24 nëntorit.
Hajdari është anëtari i dytë i KPA-së, institucionit më të lartë të procesit të vetingut që gjykohet nga Gjykata e Posaçme dhe vijon i pezulluar që prej shkurtit të këtij viti.
Më herët 2 shkallë të Gjyqësorit gjetën fajtor Luan Dacin për falsifikim dokumentesh, teksa beteja e tij vijon ende në Gjykatën e Lartë ku kërkon pafajësi.
/a.r
