Procesi i votimit ditën e enjte për anëtarët, që vijnë nga radhët e avokatëve, profesorëve dhe shoqërisë civile për në Këshillin e Lartë të Prokurorisë dhe Këshillit të Lartë të Gjyqësorit, pritet të dështojë.
Burime pranë Partisë Demokratike bënë të ditur se deputetët e saj do të largohen nga procesi i votimit, kur të hidhen për votim listat e 5 kandidatëve për KLP dhe 5 kandidatëve për KLGJ.
Duke qenë se procesi i votimit kërkon një shumicë Kushtetuese, pra listat mund të miratohen vetëm me 94 vota, atëherë procesi pritet të rihapet sërish. Pra, do të behët një listë e re, e cila do të zgjidhet me short në rast se do të mungojë konsensusi mes 30 kandidatëve, që janë kualifikuar nga Sekretari i Përgjithshëm i Kuvendit, Genc Gjonçaj, në bashkëpunim me ONM.
PROCEDURA
Sipas librit themeltar të shtetit, nëse lista nuk miratohet në Kuvend, ajo rikthehet sërish në Parlament në nënkomisionin ad hoc, i përbërë nga pesë anëtarë për t’u riformuluar. Por, nëse nuk gjendet dakordësia mes palëve dhe asnjë nga kandidatët, që është në garë nuk merr minimalisht 4 vota në nënkomision, atëherë procesi kalon në short me gogla. Nënkomisioni do të riorganizojë edhe njëherë shortin me gogla, në të cilin do të marrin pjesë të gjithë kandidatët, që janë vlerësuar si në përputhje me kriteret ligjore.
Nga ky proces do të dalin 10 kandidatë, 5 për KLP dhe 5 për KLGJ. Por në rast dështimi edhe në fazën e dytë, atëherë në fazën e tretë procesi edhe po nuk mori 94 vota në Parlament, lista quhet e miratuar sipas renditjes që i ka bërë nënkomisioni i Parlamentit.
“Nënkomisioni përzgjedh kandidatët me mbështetjen e të paktën 4 anëtarëve. Nëse nuk arrihet shumica e kërkuar, kandidatët përzgjidhen me short. Emrat e kandidatëve të përzgjedhur nga nënkomisioni, përmblidhen në një listë dhe i dërgohen kryetarit të Kuvendit. Brenda 10 ditëve, Kuvendi miraton listën e kandidatëve me 2/3 e të gjithë anëtarëve. Nëse lista rrëzohet, procedura përsëritet në nënkomision, sipas pikës 7 të këtij neni, por jo më shumë se dy herë. Në rast se, pas zhvillimit për herë të tretë të procedurës, Kuvendi nuk miraton listën e paraqitur, kandidatët e kësaj liste konsiderohen të zgjedhur. Procedura e detajuar rregullohet me ligj”,- thuhet në nenin 147 të Kushtetutës. PANORAMA
