Komisioni Rregullator, në kuadër të zgjedhjeve të 11 majit miratoi sot disa ndryshime në rregulloren për organizimin dhe funksionimin e Komisionit të Zonës së Administrimit Zgjedhor.
Ndryshimet e miratuara nga Komisioni Rregullator synojnë krijimin e mekanizmave më të qartë për proceset e depozitimit të dokumenteve, vetëdeklarimet e kandidatëve dhe procedurat për dorëzimin e detyrave.
Përmes një njoftimi zyrtar për mediet, Rregullatori pranë KQZ-së, thekson se ndryshimet kanë për qëllim të adresojnë sfidat problematikat e hasura në zgjedhjet e kaluara, për të forcuar qartësinë dhe transparencën e procedurave, si edhe garantimin e një administrimi zgjedhor më efikas dhe të besueshëm.
Në një nga pikat e vendimit, thuhet që “anëtari dhe sekretari i KZAZ-së, brenda 5 ditëve pas publikimit të listës së kandidatëve për deputet/organeve drejtuese të njësive të vetëqeverisjes vendore, duhet të vetëdeklarojë nëse është ose jo në marrëdhënie krushqie, gjinie apo marrëdhënie pune me ndonjë prej kandidatëve sipas përcaktimeve të nenit 32, pika 2 e Kodit Zgjedhor.
Në çdo rast nëse anëtari i KZAZ-së emërohet pas kësaj periudhe duhet të dorëzojë në KQZ edhe formularin e vetëdeklarimit të konfliktit të interesit sipas modelit të miratuar nga Komisioneri”.
