Analizë e La Stampa, nga Jacopo Iacoboni
Në një lëvizje historike, Shtetet e Bashkuara kanë vendosur sanksione ndaj dy gjigantëve rusë të naftës, Rosneft dhe Lukoil, duke goditur drejtpërdrejt bazën që financon “makinerinë e luftës” së Kremlinit.
Njoftimi u bë dje, 22 tetor, nga sekretari amerikan i Thesarit, Scott Bessent, dhe shënon një ndryshim të madh në politikën e administratës Trump, e cila deri tani kishte trajtuar çështjen e Rusisë më shumë si një problem tregtar sesa një konflikt ushtarak.
Sanksionet godasin jo vetëm kompanitë kryesore, por edhe 34 ndërmarrje të tjera në pronësi të Rosneft dhe Lukoil, duke përfshirë disa të goditura më parë nga sulmet ukrainase me dronë, si rafineritë e Tuapse, Ryazan dhe Samaraneftegaz.
Nga Rosneft goditen edhe gjigantë si Sibneftegaz, Bashneft, Vankorneft, Neftegaz dhe Purneftegaz. Nga Lukoil goditen Lukoil Perm, Aik A, Kaliningradmorneft, West Siberia, Uraloil dhe Russian Innovation Fuel and Energy Company.
Kjo masë mund të ketë pasoja të mëdha edhe për kompanitë ndërkombëtare që vazhdojnë të bëjnë biznes me Rosneft dhe Lukoil.
Dokumentet amerikane paralajmërojnë se çdo institucion financiar që realizon ose lehtëson transaksione me bazën ushtarako-industriale ruse, përfshirë subjektet tashmë të sanksionuara, mund të gjendet nën penalitetet e OFAC, Zyrës për Kontrollin e Aseteve të Huaja pranë Thesarit Amerikan.
Nga pikëpamja e prodhimit, Rosneft dhe Lukoil mbulojnë mbi 51% të naftës së prodhuar në Rusi, duke bërë goditjen e SHBA-ve potencialisht shkatërruese për ekonominë energjetike të Moskës.
Ndërkohë, India ka nisur rishikimin e marrëveshjeve të saj me Rusinë, duke përfshirë kompanitë shtetërore Indian Oil Corp, Bharat Petroleum Corp dhe Hindustan Petroleum Corp.
Analistët paralajmërojnë se kjo është një nga lëvizjet më të ashpra të një presidenti amerikan kundër Rusisë në dekada, dhe mund të shënojë një ndryshim rrënjësor në ekuilibrin global të tregut të naftës.
