Kuvendi ka përjetuar të premten dramën më të madhe në historinë e pasluftës, shkruan Koha Ditore. Brenda dy orësh, në sallën plenare janë aktivizuar shtatë bombola të gazit lotsjellës, nën tymin e të cilit janë marrë edhe vendime; deputetët opozitarë janë përjashtuar dhe nxjerrë zvarrë jashtë; janë arrestuar nëntë prej tyre; një është përcjellë në emergjencë, dhe ka pasur edhe të tillë që e kanë braktisur mandatin, referon Koha.
Pas këtyre zhvillimeve, opozita ka paralajmëruar ndërrimin e kursit të ndjekur prej gjashtë muajsh. Pushteti, ndërkaq, është barrikaduar në qëndrimin për të shpërfillur kërkesat opozitare, përcjell koha.net. Këto pozicione dhe konflikti i shpërfaqur rrezikojnë të barten edhe në rrugë.
