Drejtori i Përgjithshëm i Policisë së Shtetit, Ardi Veliu ka lëshuar kritika për policinë vendore të Shkodrës në analizën një vjeçare të 2018-ës. Viti që lëmë pas ishte ndër më të vështirët për policinë e Shkodrës sepse u shënuan disa vrasje të bujshme të njëpasnjëshme që erdhën pas një riaktivizimi të botës së krimit. Ngjarjet e vitit të kaluar me vrasje dhe zhdukje personash kanë bërë që drejtori Veliu të jetë kritik në analizë. Pas analizës që zgjati për rreth 3 orë drejtori i Përgjithshëm i Policisë së Shtetit nuk preferoi që të japë asnjë deklaratë pavarësisht këmbënguljes së mediave.
“Më mirëkuptoni unë nuk isha përgatitur për një prononcim për mediat”, ka thënë shkurt ai. Kritikat e kreut të policisë Veliu i pranoi edhe vetë drejtori i policisë vendore në Shkodër, Vehbi Bushati i cili tha se Drejtori i Përgjithshëm ka kërkuar punë nga policia e Shkodrës që nënkupton një luftë më të madhe ndaj krimit dhe çdo aspekti tjetër.
Mbaruam analizën 1 vjetore. Drejtori i Përgjithshëm i Policisë së Shtetit bëri vlerësime bëri edhe kritika, por ashtu la edhe detyra. Viti që vjen do të jetë një vit akoma më i angazhuar për policinë për t’ju sjellë rend dhe qetësi në funksion të qytetarëve të Shkodrës dhe njëkohësisht ne do fitojmë besimin e tyre për të qenë më afër tyre dhe për të zgjidhur problemin e tyre. Ai kërkoi punë dhe rezultate konkrete në goditen e elementëve kriminalë në Shkodër”,- tha Bushati.
I pyetur nëse është kërkuar zbardhja e ngjarjeve kriminale të ndodhura në 2018-ën në Shkodër drejtori Bushati tha se nuk kishte një koment tjetër për të bërë. “No koment”,- u përgjigj ai për gazetarët.
Në analizën njëvjeçare fillimisht drejtori i policisë Shkodër Vehbi Bushati ka lexuar një material të gjatë dhe më pas fjalën e ka marrë Drejtori i Përgjithshëm, Ardi Veliu duke kërkuar më shumë rigorozitet nga efektivët si dhe në fokus sipas tij, duhet të jetë lufta ndaj krimit të organizuar, rikthimi i besimit tek qytetarët si dhe një efiçencë më e madhe e policisë./a.meta
