Pavarësisht se në një pjesë të mirë të shteteve të botës, numrat e infektimeve me covid kanë ardhur në rënie dhe vaksinimet me dozat e para covid kanë dhënë një efekt pozitiv, shumica e vendeve vijojnë gjithsesi të furnizohen me doza të reja vaksinash kundër koronavirusit. Madje një pjesë e mirë e tyre kanë krijuar rezerva të mëdha vaksinash, ndonëse kanë vaksinuar pjesën më të madhe të popullsisë së tyre.
Sipas një vlerësimi të “Airfinity”, kompanisë së inteligjencës mbi të dhënat shkencore mjekësore, vendet e G7 dhe BE të kombinuara së bashku, pritet të arrijnë në 1.39 miliardë vaksina rezervë deri në fund të tremujorit të parë të vitit 2022, edhe nëse 80% e të gjithë të rriturve të tyre do të kenë marrë vaksina dhe doza përforcuese.
Kjo zgjedhje vjen për disa arsye. Ndonëse rastet e Covid në SHBA po vazhdojnë të bien, zyrtarët shëndetësorë po diskutojnë aplikimin e vaksinës së përvitshme anticovid, *si një strategji për të mbajtur virusin nën kontroll në terma afatgjatë.* Kreu i Phizer ka thënë se një vaksinë vjetore për Covid-19 do të ishte më e preferueshme sesa vaksinat më të shpeshta përforcuese në luftën kundër pandemisë.
*Ekspertët dhe zyrtarët shëndetësorë tani po përgatiten për një fazë ‘post-pandemike’ të Covid-it, ku njerëzit mund të jetojnë së bashku me virusin ashtu siç bëjnë me gripin. Por mbajtja nën kontroll e virusit mund të kërkojë vaksina të rregullta, vjetore.*
Në anë tjetër, revista prestigjoze “Wall Street Journal” ka raportuar së fundmi se FDA-ja amerikane po shqyrton të dhënat shkencore për një autorizim të mundshëm të dozës së katër të vaksinave anticovid. Sipas Wall Street Journal, FDA po shqyrton marrjen e një vaksine të dytë përforcuese Phizer ose Moderna, e cila do të ishte një injeksion i katërt në përgjithësi për shumicën dërrmuese të amerikanëve të vaksinuar. Vende si Izraeli kanë nisur të aplikojnë dozën e katërt.
Sigurimi i vaksinave anticovid për të mbuluar nevojat e vazhdueshme të vaksinimit është shndërruar gjatë dy viteve të fundit në sfidë për çdo shtet të botës. Sot, teksa pandemia ende nuk ka marrë fund, pavarësisht reduktimit të infektimeve, nuk duhet harruar sipas studiuesve, se sa i paparashikueshëm është ky virus.
Covid 19 mund të bëhet lehtësisht i pakontrollueshëm në mungesë të vigjilencës, prandaj duhet menduar se si ai të mbahet nën kontroll në terma aftagjatë. Aksesi i vazhdueshëm në vaksina është mjeti më i mirë për të qënë të përgatitur sot dhe nesër.
