Drejtoria e Përgjithshme e Doganave në bashkëpunim me Fondin Monetar Ndërkombëtar, si edhe me organizma të tjera vendase dhe të huaja, ka zhvilluar një analizë të situatës së mbledhjes së të ardhurave gjatë vitit 2015.
Doganat njoftojnë se partnerët e huaj kanë arritur në konkluzionin se shkak për mbledhjen e më pak të ardhurave gjatë vitit 2015 në raport me parashikimin kanë pasur:
1. Ulja e çmimit të karburantit në tregun ndërkombëtar
2. Ulja e sasisë së energjisë së importuar si pasoje e reshjeve të shumta që shtuan prodhimin në vend
3. Ulja e sasisë së produkteve bujqësore të importuara si pasojë e rritjes së prodhimit vendas
Është për të ardhur keq që institucionet shtetërore baltosen pa të drejtë e në mënyrë të vazhdueshme.
Sa i përket raportit të bërë publik nga Crown Agents, nëpërmjet një deklarate për shtyp, Doganat shqiptare theksojnë se vetë raporti tregonte se ka kaluar kohë dhe si rrjedhojë, ka pasur zhvillime të mëtejshme nga periudha e dorëzimit të këtij raporti, si më poshtë:
“Prej periudhës kur ky raport është dorëzuar ka pasur shumë zhvillime të mëtejshme, përfshirë largimin nga detyra dhe procedimin disiplinor të një numri punonjësish të Administratës Doganore Shqiptare. Për këtë arsye, komentet e bëra në atë moment të caktuar nuk qëndrojnë domosdoshmërisht edhe sot”.
Drejtoria e Përgjithshme e Doganave, në fund të njoftimin shpreh këmbënguljen për të shtuar të ardhurat në buxhetin e shtetit, për të luftuar kontrabandën dhe informalitetin. Monitor
