Përpos përmbytjeve dhe dëmeve të tjera që po shkaktoi shiu, reshjet e këtij fund-gushti po i kursejnë vendit ca para që do të shkonin për të blerë energji elektrike. Pas shumë muajsh në import, Korporata Elektroenergjetike Shqiptare ka ndryshuar pozicion, nga vetëm në blerje… drejt eksporteve. KESH ka nxjerrë në shitje 2 mijë e 250 megavat-orë energji elektrike me vlerë mbi 300 mijë euro.
Në mungesë të reshjeve, kjo shumë jo vetëm që nuk do të ishte arkëtuar, por do ishte shpenzuar për të blerë energji nga jashtë.
Vetëm gjatë gushtit, Korporata Elektro-Energjetike Shqiptare bleu nga vendet e tjera gati 278 mijë megavat-orë energji elektrike me vlerë pak më shumë se 36.6.5 milionë euro. Çmimi mesatar për një megavat-orë përllogaritet në rreth 132.7 euro.
Marrë që nga fillimi i vitit, KESH ka blerë mbi 137 milionë euro energji elektrike, 90 milionë më tepër se janar-gushtin e një viti më parë.
Rrezet e forta të diellit ulën në 1 mijë e 272 metër kub për sekondë rezervën hidrike në Kaskadën e Drinit. Për shkak të kërkesës së lartë që shumë vende europiane po kanë, të dhënat nga bursa hungareze HUPX tregojnë se ndonëse me luhatje çmimi i energjisë elektrike po rritet. /A2CNN
