Arrestohet në flagrancë punonjësi i Gardës pasi akuzohet për dhunë në familje. Ka qenë bashkëshortja e tij ajo e cila ka denoncuar ushtrimin e dhunës fizike dhe psikologjike, si dhe kanosje të përsëritura nga bashkëshorti i saj.
Pas administrimit të provave, AMP ka kryer arrestimin e gardistit, ndërsa gjatë kontrollit të banesës së tij, janë sekuesatruar 3 telefona celularë me interes për hetimin.
“Drejtoria Rajonale Tiranë, ka arrestuar në flagrancë punonjësin e Gardës së Republikës, H. S, i dyshuar për veprën penale “Dhuna në familje”, parashikuar nga neni 130/a i Kodit Penal. Hetimet nisën pas kallëzimit të bashkëshortes së tij, e cila denoncoi ushtrimin e dhunës fizike dhe psikologjike, si edhe kanosje të përsëritura. Në vijim të veprimeve procedurale u krye kontrolli i banesës së shtetasit, ku u sekuestruan tre telefona celularë me interes për hetimin. Pas administrimit të provave dhe në bashkëpunim me Prokurorinë, AMP bëri arrestimin në flagrancë të punonjësit të Gardës së Republikës, ndërsa materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë”, thuhet në njoftim.
Po ashtu, AMP ka ndaluar dhe një punonjës të Policisë së Shtetit i cili akuzohet gjithashtu për dhunë në familje. Polici E.M, dyshohet se ka ushtruar dhunë fizike ndaj vajzës së tij të mitur.
“Drejtoria Rajonale Tiranë, ka ndaluar me iniciativë punonjësin e Policisë së Shtetit, E. M, i dyshuar për kryerjen e veprës penale “Dhuna në familje”, parashikuar nga neni 130/a i Kodit Penal. Ndalimi u krye pas veprimeve të menjëhershme hetimore lidhur me dyshimet se shtetasi kishte ushtruar dhunë fizike ndaj vajzës së tij të mitur. Pas vlerësimit të rrethanave dhe autorizimit të prokurorit, AMP procedoi me ndalimin e tij. Materialet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, ndërsa i ndaluari është vendosur në dispozicion të organit të akuzës për vijimin e procedurave ligjore”, thuhet në njoftim.
