Ambasadori i SHBA-ve në Shqipëri, Donald Lu apeloi sot nga Shkodra që qytetarët duhet të kërkojnë që personat me të kaluar kriminale nuk duhet të kenë të ardhme në politikë.
Dipplomati amerikan ishte i pranishëm në përballjen e programeve elektorale të dy rivaleve për Bashkinë e Shkodrës.
Forumi me kandidatet për bashkinë e Shkodrës, Keti Bazhdari dhe Voltana Ademi, u organizua nga Shoqata e Grave të Reja Kristiane, si pjesë e projektit të financuar nga Komisioni i Demokracise së Ambasadës Amerikane. Forumi po u jep kandidateve një mundësi për të diskutuar programet e tyre, dhe prioritetet që janë specifike për çështjet e grave dhe fëmijëve.
Ambasadori Donald Lu tha se “qytetarët duhet t’u kërkojnë llogari zyrtarëve që kanë zgjedhur. Ne besojmë se shqiptarët duan të flasin seriozisht mbi tema serioze – jo vetëm retorikë politike.”
Ambasadori foli gjithashtu edhe mbi përpjekjet për dekriminalizimin në Shqipër. “Votuesit duhet të kërkojnë që personat me të kaluar kriminale nuk duhet të kenë të ardhme në politikë. Votuesit dhe shoqëria civile duhet ti shohin mirë mirë rekordet e atyre që janë kandidatë në këto zgjedhje, shqiptarët kanë të drejtën që zyrtarët e zgjedhur prej tyre të mbajnë standardet më të larta etike”, deklaroi ai.
Lu e cilësoi si një moment historik kandidimin e dy grave për këtë bashki, e tha se kushdo që të dalë fituese më 21 Qershor, Shkodra tashmë do të ketë një grua të fortë. “Pjesëmarrja e votuesve të rinj është vendimtare. Nëse nuk voton atëherë mos u anko. Mos e shisni votën tuaj”, përfundoi Ambasadori Amerikan./ATA/
