Ambasadorja meksikane në Indi është bërë lajm për vendimin e saj të pazakontë për veturën e saj zyrtare. Në vend të veturës së blinduar, Melba Pria udhëton nëpër Delhi me një triçiklet të bardhë që mban flamurin meksikan dhe targat diplomatike.
Pria ka thënë se vendosi të përdor triçiklet pasi është “mjeti më efektiv i transportit” nëpër Delhi. Triçikleta është blerë në Indi dhe është ngjyrosur nga artisti meksikan Senkoe.
“Vëmendja që kemi marrë ka qenë e mirë dhe kreative. Kjo na ka ndihmuar që të promovojmë Meksikon dhe artistët e saj. Disa njerëz janë të brengosur për sigurinë, por miliona indianë voziten me triçiklet, prandaj pse unë duhet të jem ndryshe?”, ka thënë ambasadorja meksikane, transmeton Koha.net.
“Mendoj se indianët këtu kanë reagime pozitive. Kjo nderon kulturën dhe traditën indiane”.
Triçikleta ka targat diplomatike dhe vozitet nga shoferi zyrtar i ambasadës. Pria ka përdorur këtë mjet transportues për të gjitha takimet zyrtare që ka pasur në Indi. (b.an)
