Ambasadorja e Kinës, Pang Chunxue, vizitoi Durrësin ku dhuroi ushqime dhe produkte shtëpiake për gratë me aftësi të kufizuara të qytetit.
Mbi 100 persona, duke përfshirë deputeten e Partisë Socialiste të qarkut të Durrësit, Klodiana Spahiu, dhe drejtoreshën e shoqatës “Së bashku ne mundemi”, Elsa Tasha, morën pjesë në ceremoninë e dhurimit, shkruhet në një njoftim në rrjetet sociale të Ambasadës së Kinës në Shqipëri.
Gjatë vizitës në qytetin bregdetar shqiptar, ambasadorja Pang zhvilloi edhe një takim me kryetaren e Bashkisë së Durrësit, Emiriana Sako. Të dyja palët shkëmbyen mendime mbi marrëdhëniet kino-shqiptare dhe bashkëpunimin lokal, bëri të ditur Ambasada e Kinës në Shqipëri, në një njoftim në rrjetet sociale.
Ambasadorja kineze-kryebashkiakja e Durresit (Foto Ambasada e Kines ne Shqiperi – Facebook)
Në një postim në rrjetet sociale, Sako ndau momente nga takimi me ambasadoren Pang dhe bëri të ditur se e njohu ambasadoren me historinë e qytetit dhe resurset që ofron Durrësi, sidomos në sektorin ekonomik dhe atë të turizmit, shkruan “ATSH”.
Kryebashkiakja Sako dhe ambasadorja Pang diskutuan edhe për rritjen e mëtejshme të bashkëpunimit ekonomik, turistik e kulturor midis dy vendeve si dhe zbatimin e projekteve të përbashkëta në të ardhmen.
