Ambasadori turk: Shqipëria të marrë masa kundër gylenistëve

Turqia i kërkon zyrtarisht Qeverisë shqiptare të marrë masa kundër subjekteve apo organizatave që financohen nga Fethullah Gylen.
“Ne presim që qeveria të marrë sa më parë masa efektive edhe kundër zgjatimeve të FETO-s në Shqipëri. Dihet prania e personave dhe institucioneve fetoiste në Shqipëri. Qëllimi dhe qëndrimi ynë janë të qartë.
Për më tej, për çështje që kërkojnë fshehtësi, nuk dëshiroj të bëj komente pozitive ose negative”, tha Ambasadori turk në Tiranë, Idajet Bayraktar në një intervistë televizive në Ora News.
Në vijim ai iu rikthye deklaratës së bërë nga Presidenti turk, Erdogan, gjatë vizitës së tij në Shqipëri, në 2015-ën, duke thënë “ne ju paralajmëruam”.
“Në fjalën e tij Presidenti ynë u shpreh qartazi se besojmë se Shqipëria për këtë çështje duhet të bëjë atë që duhet bërë, se priste që asnjë institucion dhe person në Shqipëri të mos ta tolerojë këtë strukturë.
Por fatkeqësisht këto fjalë të Presidentit tonë nuk u morën seriozisht dhe u kritikuan duke u vlerësuar si “konflik i brendshëm politik” nga disa politikanë të rëndësishëm në Shqipëri.
Por zhvillimet e mëvonshme treguan se sa kishin gabuar këta politikanë”, tha diplomati turk i akredituar në Tiranë.
Pa përmendur emra, Ambasadori shprehu bindjen për ekzistencën e kësaj strukture ilegale të drejtuar nga Fethullah Gylen, në shtyllat e targetuara nga ta, si arsimi, media dhe shoqëritë e biznesit.
“E dimë që organizata ka zgjatjet e saj edhe në Shqipëri. E dimë se ka shkolla, ka shtëpi botuese, organizatë të shoqërisë civile që përpiqet të përhapin ideologjinë e saj duke botuar libra të kreut terrorist.
FETO nëpërmjet insitucioneve arsimore – ku dëshiroj të them se janë më të predispozuar për t’u ndikuar nxënësit konviktorë,- përpiqet të fshehë fytyrën e vërtetë dhe të ndikojë opinionin publik shqiptar duke dizinformuar median, duke nxjerrë nëpër televiizone disa shtetas shqiptarë që i ka të punësuar dhe duke infiltruar në disa institucione fetare në Shqipëri”, tha Bayraktar.
Duke theksuar marrëdhënien e shkëlqyer mes Kryeministrit Edi Rama dhe Presidentit Erdogan, e quajti luftën kundër organizatës terroriste FETO si faktor të rëndësishëm për marrëdheniet e ardhshme dypalëshe Shqipëri – Turqi..