Ambasadori i Republikës së Kosovës në Berlin të Gjermanisë Skender Xhakaliu është nderuar me „Medaljen e Argjendtë“ të Fondacionit “Mérite Européen” për kontributin dhe angazhimin e tij të veçantë në kohë dhe situata të vështira, për një Evropë të bashkuar, duke korresponduar me moton e Fondacionit “Mérite Européen” për të çuar vendin e tij në rrugën e popujve të Evropës në liri, paqe dhe vëllazërim. Në një ceremoni të organizuar mbrëmë në Kryeqytetin e Gjermanisë e ku të pranishëm ishin politikajë të Bundestagut gjerman nga partitë e koalicionit qeverisës CDU/CSU dhe SPD por edhe nga radhët e Ekologjistëve, pastaj në praninë e diplomatëve gjermanë si dhe ambasadorë të vendeve të mëdha europiane të akredituar në Gjermani Fondacioni “Mérite Européen“ ka nderuar Ambasadorin Xhakaliu me “Medaljen e Argjendtë Mérite Européen” raporton Gazeta Blic.
Me këtë rast në fjalimet e themeluesve të këtij fondacioni mes tjerash është theksuar sidomos kontributi i Ambasadorit të Kosovës në Berlin për punën e tij të deritashme në marrëdhëniet e Republikës së Kosovës me shtetin e Gjermanisë dhe vendet tjera europiane. Në ceremoni kanë qenë të pranishëm pos tjerëve edhe Dr. Werner Langen, ish Ministër i Shtetit dhe deputet i Parlamentit Evropian, Dr. Christoph Konrad, President i Fondacionit “Merité Européen, Freundes und Förderkreis Deutschland”, Dr. Dr. h.c. Peter Spary, nënkryetar i Fondacionit “Merité Européen Deutschland”, dhe z. Michael Kühnel, përfaqësues i Komisionit Evropian në Gjermani.
“Fondation du Mérite Européen” i Luksemburgut përkrahet në Gjermani nga “Mérite Européen Freundes- und Förderkreis Deutschland e.V.“, e cila u themelua nga ish-Presidenti i Bundestagut gjerman zt. Kai-Uëe von Hassel në vitin 1995. “Mérite Européen Freundes- und Förderkreis” në Gjermani është e akredituar si shoqatë jofitimprurëse pranë Bundestagut gjerman, e cila kujdeset në veçanti për përhapjen e idesë evropiane bën të ditur Gazeta Blic.
