Ambasadori i BE-së në Tiranë, Luigi Soreca, i ka bërë thirrje politikës shqiptare të punojë për plotësimin e të gjitha kushteve të vendosura nga Bashkimi Europian, pasi vendimi për çeljen e negociatave në qershor nuk do të jetë automatik.
Sipas Soreca-s, Shqipëria do të gabojë nëse nuk do të fokusohet në këto muaj për plotësimin e detyrave, që do të mundësonin çeljen e negociatave për integrimin e vendit në BE.
“BE i ka mirëpritur shumë këto zhvillime të fundit, por duhet bërë më shumë. Koha është thelbësore dhe vendimi i qershorit nuk duhet të merret i mirëqenë. Nuk ka mbetur shumë kohë deri në etapat e ndryshme të pranverës do të ishte një gabim për Shqipërinë që të mos fokusohej për të bërë gjithçka që mund të bëjë vendi gjatë muajve të ardhshëm për t’u paraqitur plotësisht i përgatitur”, deklaroi Soreca.
Qëndrimet e tij, diplomati i BE-së në Tiranë i mbajti gjatë ceremonisë së hapjes së Presidencës rumune të Këshillit të Bashkimit Europian, e cila u mbajt në Shtëpinë e Europës në Tiranë. Ambasadori i BE-së kërkoi nga qeveria që t’i qëndrojë dhe të punojë për realizimin e detyrave që i janë lënë Shqipërisë nga vendet e Bashkimit Europian. Soreca theksoi se vendet e BE-së kanë pritshmëri për rezultate të prekshme në luftën kundër korrupsionit dhe krimit të organizuar.
“Do të ishte gabim nëse Shqipëria nuk do të fokusohej këto muaj. Ajo që shtetet anëtare presin nga Shqipëria u tha qartë qershorin e kaluar: Të konsolidojë progresin në përparësitë kyçe dhe veçanërisht, të japë rezultate të prekshme dhe konkrete në luftën kundër korrupsionit dhe krimit të organizuar”, nënvizoi ambasadori i BE-së. Për Soreca-n, përmbushja e detyrave të caktuara për Shqipërinë do të kërkojë një dialog konstruktiv midis të gjitha partive politike.
“Vendi duhet të orientojë të gjitha përpjekjet e tij drejt këtij objektivi. Për këtë nevojitet një dialog konstruktiv midis të gjitha partive politike. Gatishmëria e tyre për t’u bashkuar për të mirën dhe interesin e të gjithë shqiptarëve është thelbësore për të ardhmen europiane të Shqipërisë. Reforma Zgjedhore për të adresuar rekomandimet e OSBE/ODIHR-it paraqet një mundësi të menjëhershme për të demonstruar pa mëdyshje këtë gatishmëri për marrëveshje dhe bashkëpunim ndërpartiak”, u shpreh Soreca.
/a.meta
